المداح وقصة نجاح هلال

صديق عزيز أرسل لي هذا لنشره
وأنا استجابه لرغبته سأنشره بدون تدخل رغم ان لم أشاهد المسلسل مسلسل

المداح اتعرض على مدار 4 سنين .. أنا عمري ما كنت من جمهور المسلسل ولا من الناس المداومة على مشاهدته بانتظام ، ومشاهدتي ليه كل سنة مقتصر على أول حلقة اللي بتتعرض قبل رمضان بيوم وآخر حلقتين اللي فيهم الخلاصة .. مع شوية البوستات والميمز بفهم الأحداث

السنة دي تابعت الجزء الرابع حلقة بحلقة وفهمت الأحداث بسهولة لأن كل جزء بنسبة كبيرة بيبقى مستقل عن اللي قبله .. ومن متابعتي لكل مسلسلات الـ30 حلقة تقريبًا عاوز أقول إن المداح أحسنهم وأكترهم محافظة على الرتم

شيء مبهر إنك تكون عامل ده ومسلسلات كتيرة حواليك جزء واحد والمفروض أحداثها تكون غنية وكتيرة بس معندهاش محتوى تقدمه في حلقات كتير ، وأنت في جزئك الرابع ولسة عندك جديد وبتضيف شخصيات وشخصية بتخلص غيرها بتيجي وحتى لو فيه ملل في حلقة اللي وراها بتبقى أفضل

الإضافات كمان هايلة الجزء ده في الأغاني اللي قالبة السوشال ميديا لحد النهاردة والموسيقى التصويرية عاملة جو حلو في المسلسل وأوقات كتير استخدامها حلو عكس مسلسلات تانية

إضافات الممثلين كذلك .. فتحي عبد الوهاب متقل المسلسل جدًا وجزء كبير من نجاحه ، دياب وحمزة العيلي وسهر الصايغ ، أحمد خالد صالح ولسة بنتكلم في حلقات تانية جاية والمفروض إنها هتكون أحلى حلقات المسلسل عشان بنقرب من النهاية فـ مفيش شك إن المداح نجح السنادي

ولا فيه شك إن حمادة هلال محبوب وعنده شعبية كبيرة نجحت المداح على مدار 3 سنين ، وكانت هتنجح المداح السنة دي حتى لو كان مستواه مش عالي ما بالك بقى واحنا بنتكلم في أنجح مسلسل 30 حلقة اتعمل السنة دي
حتى لو مكنتش من جمهور المداح فـ نجاحه بالنسبالي شيء يحترم وتجربة مشاهدته ماندمتش عليها خالص

شهيرة النجار