تعالي أقول أسعار فنادق الساحل والأكل ولعت من امتي يا عم خالد يوسف من يوم ما العبار عمر جيبه من الساحل

قرأت تعليقا للمخرج خالد يوسف يصرخ من أسعار الإيجار بالساحل الشمالي وكتب معقول الواحد يدفع مليون جنيه إيجار في أسبوع دا غير مصاريف الأكل والشرب؟
وأنا أقول لك تعالي أعرفك السبب بدأ منذ واي؟

زمااان بس مش زمان أوي كانت أسعار الفنادق والشقق في إسكندرية معتدلة بالصيف تشد في شهري الذروة يوليو وأغسطس وفي كل الأحوال لأنه كان المصيف الرئيسي لنخبة مصر فكان الجميع يجد مبتغاه في السعر
فيه ناس تمتلك شقق من أهل القاهرة ومنهم فنانين عظام مثل سميحة أيوب ونادية لطفي وماجدة ومرفت أمين ومحمود عبد العزيز وقايمة طويلة

وفيه كان بيحب يؤجر شقق
وفيه يؤجر شاليهات لما كان زمان فيه شاليهات
وفيه يحب نزول الفنادق وكانت فنادق الدرجة الأولي ثلاث شيراتون المنتزة وفلسطين وسان جيوفاني دافيز فنادق درجات بسيطة علي الكورنيش. كله كان بيجد اللي محتاجه فيها
مرت سنين دخل هيلتون وكام فندق وبرضه الأسعار تظل سنوات. كما هي كبيرها 500 جنيه
الناس طلعت العجمي وبعده ماربيا وبعده مارينا وكان الايجار نفس السعر في الشاليهات وفندق هيلتون برج العرب

ومرت سنين والدنيا تمام وكله يجد سعر معتدل
حتي وقعت الواقعة والعبار أخد أرض مراسي وعمل حفلة كبيرة جدا كتبتها في 2005 أظن
ودعا كل فناني ورجال أعمال مصر وجبال الكافيار والاستاكوزا وروبي طالعة جديد أخدها في أيده شريف صبري ياولاد بجد شكلها زي ماهي راكبة العجلة كدا؟

لا دي دولي شاهين واو طب غنت ؟
لا حضرت بس لبست هوت شورت اي نااار
مين غني؟
سنه غنت نانسي عجرم كانت كهربا الموسم
وسنه غني عمرو دياب وقال اي وقتها شوفوا فن الدعاية

قرر يكون ميعاد حفلته في 15 أغسطس عند العبار في أرض الجنة الجديدة مراسي
ماكانش فيه غير دعاية
ومن هنا كبر العباااار وكبر عمرو وبقا اسمه علي لوكاندة كبيرة

زي لوكاندة المندرة فاكرين الفيلم دا ونجح
ليلي علوي. لوحدهاوجوزها . منصور الجمال قاعد مع أصحابه

هكذا كتبت وقتها بروماجندا ياعزيزي وأنا أيدي اللي تتقطع دي كتبت بعبط ومصر تقرأ وهو يعبي فلوس
وأنا ما أعرفش أعدي من جنب سور مراسي
سبحانه!!!
باع بملايين
السنة التالية حفلة أفخر وشرحه
الفيلات بيعت

وتبقي فندق سيدي عبد الرحمن. قبلة كل عشاق الهدوء والراحة حتي من جماله وبعده وكان في الخلا كان فيه استراحة ملحقة بالفندق لجمال عبد الناصر وآخري لعبد الحكيم عامر
والسعر حاجة ببلاش كدا

وكانت الناس بتروح تاجر بدري بدري من شركة ايجوث المالكة للفندق تمام في إسكندرية من الشتاء لتضمن أماكن لها في الصيف وكان دا فكرة ممتازة جعلت كثيرين لايشتروا بالساحل أصلا وليه يشتري وهو بيصيف ب5000 في السنة كل ويك اند يطلع سيدي عبد الرحمن بدل ما يدفع 500 ألف في سعر فيلا
كانت دي أسعار زمان في البيع والشراء

قوم ظهرت فنادق مثل ألماظة وغيرها بعده وكانت أسعارها أيضاً بسيطة جداجدا لا تزيد عن 500 جنيه

وظل فندق سيدي عبد الرحمن. حلو كدا
بدأ يولع لما فيلات مراسي كانت ب10 و30 مليون دا من 15 سنة
يبقي سعر الفندق كما هو ؟
لا واللي خلق الخلق
الحجرة نطت فطت بقت ب2500 وسويت 3000 بعده 4000 لحد ما العبار أخذ الفندق وبقت الحجرة انهاردة عنده في عين العدو ضايل ب30 ألف
إيوان 30 ألف
ماهو جوا مراسي والغاوي ينقط بطاقيته وهتشوف الأكابر كلهم ياعم بقا
وكان فيه رجال أعمال ثقال جداً جداً بياجروا في الفندق كل ويك اند وياجروا فيلات
وجدوا الأسعار كدا اشتروا فيلات وشاليهات بدل الأرقام الفلكيه دي

عملوا اي بتوع مارينا الطيبة ؟

يسكت أصحاب الفنادق الآخري في مارينا الطيبة ذوي النجمة والنجمتين والثلاث؟
إنما لايمكن الحجرة ب5000 نجمتين
هوب ب10 تلاف يامؤمن و14 ألف الليلة.
طب اللي بياجر بيته هوب اليوم ب4000 اليوم في مارينا الطيبة و15 ألف اليوم في شاليه حجرتين وصالة في هسيندا وكل ماكان قرب الأكابر والبحر والدوشة كل ماكان سعره أعلي
الفيلا إيجار في مراسي اليوم ب100 ألف
ايوا الرقم صح يعني الشهر ب3 مليون
واللي يعني شويا ضيقة وفرشها مش واوين ممكن ب2 مليون في الشهر
هو أنا هشيربها؟
لا هتنام فيها سقف وحيطان
وكمان في مراسي ومفروشة فرش فاخر ولا القصور القاهرية للاقامة الدائمة

طب ليه دا 3 شهور. صيف؟

3 شهور صيف دول هما السنة كلها
العلاقات كلها
الصفقات كلها
الدنيا هي ال3 شهور دول
واللي لازم يبقي برنس يفرش ويكبر في الأماكن دي
أومال المقامات تبان إزاي؟
طب الكراسي الخوص والبلاستيك والسراير البسيطة ودولابين دي فين؟
لا ممكن تلاقيها في بيوت ماقبل هسيندا يا باشًا أما من هسيندا وطالع. شوف
وللحق فيه كام فيلا وقصر في مارينا خيااااااااال

طب طالما السعر في مراسي كدا
يبقي في هسيندا الحمرا والبيضا بكام؟
يبقي في غزالة وأمواج بكام يبقي في مارينا العاديه وما قبلها بكام؟

كله ولع من يومها

بس ياعم قوم بقا كله جاب نار وولع الأسعار ومعاها زيادة الدولار والكام تعويمة

اشمعني أسعار الإيجار
نولع الأكل
وأسعار السوبر ماركت
ونفتح كافيهات. وكافتيرتات ومطاعم وطبق السلاطة بألف جنيه
ودا فيه اي؟
نص بيضة علي حته تونة علي ورقتين خس ورشة لمون وخل وفلفل وعشان المنظر اديها لطشة مسطردة صفار بقا
طب نأكل ماكدونادز وبيتزا وكنتاكي؟
اسكت دي أسعارهم الدوبل عشان في الساحل
خلاص نأكل فول وطعمية؟
أسكت دي القرص ب10 جنيه
ولو أكلته في مطعم ب199 جنيه القرص؟
ايوا القرص روح جرب
طب نعمل اي؟
تنزل أقرب مكان ليك غالبا كفر العجمي أو مرسي مطروح تجيب طلباتك

ياسيدي

ومن هنا بدأت حكاية أسعار الساحل الشمالي المصري ومشقلب حاله العبار
واللي يعرض بضاعة والناس تروح لها تستحق تتبغدد وترفع في سعرها وعجبي

شهيرة النجار