تلك عشرة كاملة لتفهم ليه كسبرة وحمو بيكا بقوا صف اول وتريند

وصلني تحليل ممتاز لظاهرة كسبرة وبيكا وددت اطلاع القراء عليه ممتاز ويحل كل الشفرات

■ رامز جلال ف آخر حلقة لما حب يعيد بعض الحلقات جاب حلقة كزبرة وحمو بيكا.
ده معناه ايه ببساطة، ان الحلقة دى جابت مشاهدات عاليه وطلعت تريند ع النت فبيعيدها للناس.
ده برضه معناه ايه ان الشخصيات دي بتبيع كويس والناس بتحبها.
أغنية كزبرة الأخيرة جايبه ٩ مليون مشاهده ع يوتيوب والقناة كلها جايبه ٨٨ مليون مشاهدة.
قناة حمو بيكا ع اليوتيوب جايبه ٧٣١ مليون مشاهدة.
فيلم الحريفة إلي هو بطولة شباب صغير منهم كزبرة ايراداته أكتر من ٧٢ مليون جنيه داخل مصر.
يبقي المعامل الأول بيقول ان الناس دي عندها القدرة علي بيع نفسها، وليها جمهور بيستني إنتاجهم وبيحبهم.

■ في كام واحد ف مصر زي حمو بيكا وكزبره؟
١٠٠٠ مثلا، طب كام واحد منهم مشهور ١٠٠ مثلا؟
في كام واحد بيتخرج من كلية تجارة كل سنه ١٠٠٠٠؟ كام واحد منهم شاطر ف تخصصه وهيغير واقع الشركة إلي هيشتغل فيها، أقل من ١٠٠.
ده ببساطة اسمه قانون الندرة، أنت ف منك كام وسعر قوة عملك ف السوق كام لو كنت محترف جداً.
المعامل هنا هو ان كل ما كان إلي شبهك قليل هتبيع أكتر.

■ ف كام مدرس مليونير ف مصر؟
كام دكتور كشفه ف دقيقتين ألف جنيه وبيكشف ع ٥٠ ف اليوم؟
كام محامي بياخد ف القضية مئات الألاف؟
ف كام مطرب شعبي مغمور، بيغني ف الأفراح ب ٢٠٠٠جنيه؟
كتير جداً ع فكرة، فبتالي مينفعش تقارن واحد ف قمة مجاله بناس لسه ف أول الطريق ف مجالها.
قارن محترف بمحترف هتكتشف ان طريق العلام الاحترافي بيكسب أكتر بكتير ومضمون أكتر من مغامرة الشهرة.
ده المعامل التالت.

■ صناعة الترفيه والقضاء ع الملل هي أغني الصناعات ف العالم، عشان العميل نفسه عايز يدفع ف ده عشان يواجه مصاعب الحياة والمآسي ف العالم.
يعني ف كل حتة ف العالم الممثل أو المطرب بيكسب أكتر، لان العملاء بيدفعوا ف الصناعة دي كتير.
ده ببساطة قانون السوق، ده المعامل الرابع .

■ استحقاق الطبقة الوسطي وطموحها ف العالم غريب جدا، هو شايف بما انه عنده قيم محدده ودخل سلك التعليم للآخر فبتالي من حقه يكسب أكتر أو يشوف تقدير من المجتمع.
المجتمع أو العملاء مش هيدوك الكريديت إلى أنت عايزه إلا لو أنت مؤثر ف مصلحتهم بصورة مباشرة.
يعني مهما كنت عالم الناس مش هتقدرك إلا لو فهموا أنت هتفيدهم ب ايه.
الناس مش مهتمه بيك مهتمه بنفسها ده المعامل الخامس .

■ التعليم النظامي مبقاش الوسيلة الوحيدة للصعود الإجتماعي زي الأول، بقي ف وسائل تانيه كتير.
لكن لو عايز تصعد اجتماعياً من خلال التعليم.
لازم تكون مختلف عن الآخرين ومحترف ف مجالك مش مجرد معاك بكالوريوس مثلا، لا، أنت محتاج تعليم ذاتي قوي سنين من الكفاح والمجهود عشان تساوي الخريج إلي زيك ف العالم الأول.
اتقانك للعلم واحترافيتك هي إلي هتحدد سعرك، ده المعامل السادس.
■ اللطم والعويل والمظلوميات والتحسر علي الزمن الغابر وعلي القيم والأخلاق المهدرة مش هيغير الواقع بتاعك.
مش كل الناس عندها نفس أفكارك أو محاذيرك، ومحدش مسئول عن تغيير واقعك السئ غيرك أنت، ده المعامل السابع .
■ معركة الفقر هي معركة مهمه جدا ف حياة الإنسان.
عندنا عيال قدرت تخرج من أسر واغلال الفقر بطريقة ما.
الطريقة دي أنت شايفها ملوثة وبتضر المجتمع.
حقك تنتقدها طبعاً.
لكن لازم تبقي فاهم أنت هتعمل ايه ف معركة الفقر بتاعتك هل اختياراتك هتقدر تعديها ولا لا.
هتقولي ما الاسفاف بيكسب أكتر وأنا راجل شريف.
حلو هل ف ناس شرفاء زيك كسروا قيد الفقر ولا لا؟ أعمل زيهم.
معركة الفقر، ده المعامل التامن .
■ مفروض المجال إلى أنت بتمتهنه تكون بتحبه وعندك رسالة فيه ومينفعش اي فلوس ف مجال آخر تغريك.
ده المعامل التاسع.
■ السوق والعميل المستهدف.
الناس مش زي بعضها، العملاء مليارات ف العالم عندهم مليارات الاحتياجات ووجهات النظر.
السوق وقواعده بتتغير كل يوم وكل جيل مختلف عن إلى قابله.
دور ع سوقك وعلي عميلك المستهدف إلي هيشتري بضاعتك، هتلاقيه بسهولة.
مش لازم تبص ع سوق وجمهور مش بتاعك.
ده المعامل العاشر .
🚨 تلك عشرة كاملة.
》》 ده تفسير عقلاني محايد عن الظواهر إلي زي دي، بالطبع مفهوش دفاع أو حتي هجوم عليهم، لكن محاولة لفهم قواعد السوق الجديدة.

شهيرة النجار