الأربعاء, أبريل 17, 2024
دفتر احوال مجتمع مصر

فين أهل إسكندرية ؟ نقلوا زايد والتجمع وسابوا لنا البلد ليه ؟ تحولات في مجتمع تغير180درجة من هم ؟؟ خلاص سابوها الحلقة (١)

شارك المقال

كلما قابلت صديق أو صديقة أعرفهم يقول لي أنا خلاص نقلت زايد
أنا رحت التجمع
أنا في أكتوبر
يووه


بجد الكلام دا؟
آه اسكندرية خلاص بقت زي الكفر وحتي البحر بقا مفيش زحمة
ناس أخر 12 سنه مش شبهنا
الرزق ضاق
في مصر تلاقي الحاجة اللي بتتباع هنا بجنيه تتباع بعشرة
المطعم هنا لما بيفتح هناك بيكسب مائة الضعف

فاكرة الله يرحمه علاء عرفي؟
طبعا فاكراه الله يرحمه اشمعني؟
فتح في زايد زمان المطعم اللي فتحه كسبه قد اللي كسبه من المطاعم والنوادي اللي فتحها
عارفة الله يرحمه قال لي كدا مرة


طب عارفه فلانه بتاعه الستائر الشهيرة؟ آه طبعاً
أخدت بناتها وراحت زايد وفتحت جاليري وعيشتها لوز وجوزت بناتها هناك


عارفة بتاع الورد في رشدي؟
طبعاً
أخوه راح زايد وفتح محل ورد وعيشته ورد عليه فل عليه عجب


عارفة عيلة زهران أشهر وأكبر عيلة في إسكندرية مع أربع عائلات أخري ؟
طبعاً حبايبي
أحفادهم طلعوا زايد حتي الآباء والأمهات
دا حتي الجيل الثالث باع شققه وطلع يستقر في زايد


عارفة طنط فلانه بتاعة الموبيليا؟
آه حبيبتي كنت بشتري منها ومحلها جنب البيت رايحة جايا أعدي عليها؟
نقلت وأخدت بناتها وحفيداتها هناك
بصي إسكندرية مابقتش لنا دا حتي بنت تاجر السيارات الكبير آوي أوي خلاص بتشطب بيوتها عشان تنقل رسمي هناك بدل ما بتقعد خميس وجمعة بس وشارية لكل أولادها هناك


طب عارفة صاحب مصنع الأدوية الكبير؟ طبعاً حبايب عايش في هايتس هناك وتقريباً بيجي إسكندرية زيارة يطل علي شغله
طب عارفة المقاول فلان؟
طبعاً
بيبني هناك في التجمع لعبت معاه بني عمارات وفيلات في زايد ونقل هناك


طب عارفة رجل الأعمال الكبير بتاع المصانع ؟ طبعاً نقل وجاب بدل البيت إثنين هناك
طب عارفه بتوع مصانع الخشب والمنتجع ؟ طااابعا اشتروا وعاشوا هناك
طب عارفة


خلاص خلاص هو لسه فيه حد في إسكندرية؟!!
لسه ما كملتش عارفة دكاترة التجميل فلان وفلان؟ آه
فتحوا وقعدوا هناك


طب عارفة أصحاب صيدليات كذا؟ طبعا نقلوا هناك
طب عارفه صاحبة محل ديكور الافراح؟
طبعاً
نقلت هناك ونقلت شغلها كمان
طب عارفة أصحاب محلات مجوهرات كدا؟
اه
نقلوا هناك


طب عارفة رئيس البنك. بتاع زمان فلان؟
طبعاً
نقل بأولاده هناك في فيلات
طب عارفة بنت رجل الأعمال بتاع حزب الوطني الشهير دا زمان؟
طبعاً نقلت هناك


طب عارفة بنات صاحبتك وأحفادها فلانة
طبعا دي عارفاها نقلوا من سنين مابين أكتوبر والتجمع
طب كويس إنك عارفة دي


وطبعا عارفة عائلات منصور. وطلعت مصطفي هناك بحكم شغلهم
ولسه بقا كل عيلة حد من ولادها يطلع جامعة في القاهرة يشتروا ويقيموا بالقاهرة وبيعتبروا إسكندرية كفر


وكل واحد عايز فرصة عمل في شركة مالتي ناشونال يطلع هناك ويؤجر ولما يستقر في شغله بيشتري ويجيب عيلته


وهكذا طلعت أجيال إسكندرية الحالية والتي سبقتها وأصحاب الأعمال والمحلات والمطاعم والباحثين عن فرص عمل كبيرة للعامرة القاهرة في زايد والتجمع


حتي أنك تفتح الباب تلاقي نفسك كأنك قاعد في كلوب هاوس نادي اسبورتنج كله بيعدي يسلم عليك هكذا وصف لي صديق الوضع الحالي
طب من يقيم ويشتري في إسكندرية؟
اللي باقي اللي رابطه الحنين أو اللي ليس لديه فرصة للخروج منها أما مالياً أو عملا
واللي بيشتري البيوت هنا طبقات جديدة طلعت مش مفهومة علي زحف المحافظات المجاورة
وهكذا تم تفريع المدينة من السكان الأصليين
هكذا يقولون


يعني أهل القاهرة يروحوا مراسي يشتروا للصيف
وأهل إسكندرية استقروا رسمي نظمي بأسرهم وأعمالهم وفتحوا شغل واشتغلوا في شركات مالتي ناشونال هناك
طب وإسكندرية ؟


لها السكان الجدد دا حتي الموظفين واللي كانوا بيشتغلوا في مصانع إسكندرية العريقة زي راكتا والورق الأهلية ومطابع محرم والنشا والخميرة وشركات الزيوت والغزل وكله خطفوهم أصحاب المصانع الاستثماري وعاشوا هناك واستقروا
حتي الدكاترة والمدرسيين طلعوا زايد والتجمع يشتغلوا هناك عشان المرتبات أضعاف والعيشة غير


والناس غير مش هنا في إسكندرية اللي يكح يبقي حديث البلد من بحري للمنتزه
واللي يتكلم كل الناس سمعاه وكله مركز في كله عشان ضاقت والناس تغيرت
دا حتي اللي عايز يجوز ابنه يطلع يعمل له فرح هناك


اللي عايز يسهر يطلع القاهرة يسهر هناك
اللي عايز آي حاجة يقول جزر أقصد زايد والتجمع
أصبح الآن عنوان الوجاهة والشياكة إن الإسكندراني ينقل زايد والتجمع
طب تيجي نكمل عد وناس تانية كتير أوي ؟؟
تعرفي ان كل الجيل اللي تخرج سواء من كليات إسكندرية أو القاهرة غالبيته استقر هناك ؟
فرص عمل كتير ومرتبات أعلي وناس مختلفة رغم الأسعار العشر أضعاف إسكندرية لكن الحياة هناك غير

سابوا الترام وهان عليهم

فين اسكندريةبتاعة كل الجنسيات والأديان الكوزموبوليتية ؟ فين ريحة إسكندرية والمتعة في الشتاء أكثر من الصيف؟
فين ريحة البحر وشكل الجمال ؟

بنات يهود في اربعينات القرن

إسكندرية كانت زمان مالهاش دين معين أو جنسية معينة أو ثقافة معينه ..

خليط عجيب لا تجده إلا في إسكندرية تمشي في شوارعها تسمع لغات كتير وتقابل ثقافات كتير وأديان وطوائف كتير يعني الشارع الواحد موجود فيه جامع وكنيسة ومعبد يهودي .. العمارة الواحده تلاقي فيها جريج وارمن وأتراك وطليان وشوام ومصريين ونوبيين .. مسلمين على مسيحيين على يهود على دروز ومن كل شكل وجنس ولون عايشين بسلام وكل واحد بيمارس طقوسه أو شعائره الدينية بحرية ومحدش بيتدخل في شئون حد ولا حد بيكفر أو بيخون حد

تلاقي قهوة لليونانيين بس فيها ناس من جنسيات تانية .. مطعم إيطالي بس رواده مش إيطاليين فقط وهكذا ..
كل ده انصهر في قالب واحد هو إسكندرية .. حتى اللهجة إسكندرية خليط من لغات ولهجات كتير جدآ

الصورة لبنات إسكندرية من اليهود

شهيرة النجار

Welcome to حكايات شهيرة النجار

Install
×