للمتنمرين براندا البحيري. : الموضوع مش مرتبط بأكل ،،الموضوع مرتبط بصحة نفسية سعاد حسني كانت بتأكل أرز ومحشي في التصوير عادي

راندا البحيري كانت في برنامج مع مروه عبد المنعم وكانت بتتكلم في سبب ابتعادها عن الساحه وليه مبتشتغلش وكل الكلام ده ،، والناس سابت كل ده ومسكتها في الكومنتات تنمر و قلة أدب وتجاوز علي زياده وزنها ،، ومش عايزة اكرر اللي اتقال لانه عيب قوي والله
ولازم الناس تفهم حاجه مش لراندا بس انما لاي حد ،،
العبثيه في البحث عن الكمال الشكلي بقت هوس عند كتير من الناس يعني لما يبقي شخص وزنه زايد أو شكله متغير أو أصلع أو أسنانه فيها مشكلة تلاقي كميه تنمر وقلة أدب وتجاوز غير طبيعي تحت بند اصلنا بننصحه وعايزين مصلحته!؟
وأنتم مالكم
ياسادة بشكله أو بصحته دي حاجة متخصش حد نهائي غير صاحب الشأن سواء مشهور أو لا
أنت تعرف عنده أمراض ايه؟!
أنت تعرف بيأخد أدوية ايه ممكن تبقي سبب الوزن الزايد ده بس ميقدرش يبطلها !؟

أنت تعرف عنده اكتئاب ولا بيأخد كورتيزون ولا ولا وخمسين ألف ولا ممكن اقولهالك!؟
طيب مين قالك ان كل الناس لازم تبقي أسنانها هوليود سمايل !؟
مين فهمك ان ده الطبيعي والصح!؟
طيب مين قالك ان كل الرجاله لازم شعرهم يكونوا زي شاروخان فلازم يزرعوايا يركبوا باروكه عشان يعجبوا حضرتك!؟
يا افندم الممثل مش موديل واللي عمله الأمريكان والهنود في السنين الأخيرة من تحويل الممثل إلي مانيكان وموديل شكلي فقط هو عبث لا علاقه له بالفن والموهبه!
هتقولي الصحه والشكل والمش عارف ايه هقولك تمام زي الفل كل واحد أدري بنفسه وظروفه واللي ليك أنك تقيمه كفنان وأفعال وتصريحات مش أنك تقعد تهينه وتغلط فيه عشان مقتنع انه تخنان عشان طفس !؟
يا اخوانا نص الناس اللي بيزيد وزنهم فجاة مش بسبب الأكل

انما بسبب مشاكل صحيه أو أدوية
فحرام وعيب
الناس بجد بقت حاجه صعبه جداً ولازم نفوق لنفسنا في التعامل شويه ونرجع لاخلاقنا لان الغرب والسوشيال ميديا حولوا كتير من الناس لشيئ مهين

وكلامي هنا عام للكل مش عن راندا
بالمناسبة راندا من الطف الشخصيات اللي ممكن تتعامل معاها وممثله شاطره علي فكره وبنت ناس ومنّ عائلة كبيرة إجتماعيا وماليا ووالدها من الشخصيات التي لا تجد لها مثيل في الأخلاق والجدعنة
ملك السوق في مجاله
أعرفه من قبل ما راندا تدخل مجال التمثيل الذي دخلته بالمناسبة من باب الموديلنج والهواية
يعني راندا بنت ممتازة من كله
ومتستحقش التنمر ده كله !!

وعلي فكره راندا وزنها ده من أدوية وتعب برضه عشان بس اللي فاكرين انه من حلل المحشي فعيب بقا

بالمناسبة سعاد حسني كانت بتأكل في التصوير أرز وخضار ومحشي عادي ووزنها كان رشيق
وماجدة كانت بتأكل في التصوير أكلات مسبكة
ونجمات الجيل الجميل كن علي الرشاقة دي مش حارمين أنفسهن
فالمسألة ليست بالأكل مطلقاً

بالمناسبة راندا لما ظهرت أول الألفية الأولي كسرت الدنيا بملامحها وكانت صورها علي غلاف اي مجلة قادر يجعل المجلة تنفذ في ساعات
المجلات العربية الفاخرة ومجلات الموضة كانت لتتهافت عليها
لذلك خطفتها السينما لتستفيد من شهرتها وهوس الناس بها
راندا مثل اي إنسان بيمر بمراحل نفسية ودا طبيعي للإنسان السوي
الإنسان مش ماكينة ولا قطعة حديد
وراندا بالمناسبة ناجحة كسيدة أعمال ولها بيزنس مفتخر ووجه ترويجي يتهافت عليه اللي بفهموا
وضيف ناحج في الافتتاحات ذات الدرجة الأولي فلو لم يكن لها قبول في كل حالاتها ولو لم يكن لها وزنها ماكان دعاها أحد
دا للعلم

شهيرة النجار