٧ طرق للتعامل مع الاحباط في الحياة ..

الدكتور أسامة شوقي دايما يبهر طب
يبهر
سير ذاتية مفيش زيه
قص وحكي
عجب
ذكريات
مفيش بعد
كدا
والآن
نصايح
كتب

١) أولا لازم نتفق و تقتنع أنك مش أنت الوحيد اللي عندك مشاكل و مش أنت لوحدك اللي الزمن معاندك و لا أنت اللي حظك هباب و نحس و الناس اللي حواليك اندال.. مش أنت الوحيد اللي انضحك عليك و اتلعب بيك و لا أنت الوحيد اللي خانوك و اتخلوا عنك و اذوك.. و لا أنت الوحيد اللي عايش في ظروف بلد صعبه و الدنيا غاليه و العيشه لا تطاق ..
بادئ ذي بدئ و قبل ما نتكلم في حلول و طرق لمقاومه الاحباط، لازم تعرف ان معظم الناس تعاني زيك و يمكن أكتر منك .. و حتي في بلاد غنيه و مستغنيه.. و يمكن كمان ناس في مراكز كبيره و رجال أعمال مليونيرات عندهم اللي مكفيهم من القلق و الاحباط و يمكن لا ينام الليل من النكد و الهم..

٢) عليك أنك تهدأ شويه و تقعد براحه كده و تفكر في حياتك السابقه منذ زمان و تراجع نفسك و تشوف أنك برضه مريت في فترات هباب و كنت مخنوق و محبط و حاسس ليس لها من كاشفه و بعدين فاتت و مرت و اتنست و سابت ذكري بسيطه..
متخليش الاحباط يكون تاتو وشم لازق في جلدك للابد ، خليه زي صبغه الشعر يزول مع غسيل الرأس بعد شويه

٣) بلاش والنبي تجميع و تركيب المشاكل كلها فوق بعضها،، يعني فكك الهم و خلي كل هم لوحده و بعيد عن اللي جنبه.. مثلا خناقتك في الشغل ، زونب الزملاء، ارتفاع الأسعار، خناقات البيت..
بلاش تركيب كل الهموم مع بعضها.. حلها و فكها و خلي كل واحده تاخد وقتها و محلها..

٤) برضه اللجوء للمولي و الصلاة و قراءه الكتاب المقدس و زياره بيوت العباده، فيها تنفيس و تهوين وًاحساس ان هناك القوي القادر اللي ممكن يحلها و لو بعد حين..

٥) خد بعضك و أنزل زياره لمستشفي ٥٧٥٧ أو معهد الاورام ، قسم الحروق في قصر العيني، أو قسم غسيل الكلي.. خد معاك شويه ورد و شوكلاته ، توزعهم علي المرضي و تقعد لحظات وياهم.. حترجع البت و تلاقي روحك بتقول، الحمد لله قوي قوي🙏🙏🙏

٦) اغصب علي روحك ممارسه رياضه حسب قدراتك و امكانياتك ، وًاضعف الايمان تتمشي.. تاخد بعضك اتجاه كورنيش المعادي و أنت رايح نواحي حلوان .. تركن و تنزل م العربيه و تتمشي ساعة المغربيه أو في الفجريه..
بص لنهر النيل و اسرح بخيالك في قطرات المياه اللي سافرت ٦٠٠٠ كيلومتر من قلب أفريقيا ترتطم بصخور و شلالات و تجرف في طمي و زراعات و دلوقتي قدامك تتهادي علي سطح النيل تواصل رحلتها إلي المصب في البحر المالح..
صدقني و أسمع كلامي..
النيل دا لوحده حكايه.. النيل حكايه و مرايه..مرايه تعكس رحله الخلود السرمديه اللانهائيه.. رحله مفعمه بالعنف و الاندفاع الهادر و التلاطم ثم السريان هوينا بهدوء و نعومه ..

٧) آخر نصيحه و تاج الحكمه و الموعظه ، أقول لك .. اقرأ كلامي من تاني .. و فكر فيه بهدوء و أماني.. و بلاش تقراه نظام فيسبوك سريع السريع..
حس و أشعر بمعاني الكلام و ساعتها حتلاقي روحك هديت و عايش في وئام..

شهيرة النجار