أغرب من الخيال حدث بالعلمين. تحت عنوان الموت والقاسية قلوبهم حكاية من يومين

نشرت الصديقة سحر مازن عبر صفحتها الشخصية ما يلي

عاوزه احكيلكم حكايه غريبة شويه ومن فضلكم كملوها للآخر منذ أكثر من ١٠ سنين كنت بأحد الجروبات ومن خلال مناقشاتنا بدأت اختلف مع أغلبهم لاكتشف انه جروب الدكتور الذي يديره والادمي بتاعه اخواني من الدرجه الأولي وطبعاً مجمع كل حبايبه فيه والحقيقه من خلال اختلافي مع الأغلبية من خلال بوستاتي خرجت من الجروب ده و تواصل معي أكتر من صديق احتفظت منهم باتتين فقط واحد عايش في إيطاليا وواحد عايش في إسكندرية وظلت علاقتنا فيس بوك من خلال ما ننشره بس مش ده الموضوع اللي عاوزه أقوله ده مقدمه للي هحكيه
جمعتني بالشخص بتاع إسكندرية ظروف مشابهه فقد
فقد ابنه من حوالي ٨ سنين وأنا فقدت ابنتي من ٥ سنين
أمس الساعه ٨ بالليل وجدت منه اتصال ماسنجر تليفوناتنا مش خدناها من بعض خلال ١٠ سنين معرفه
غير أننا لا نتواصل فيس بوك إلا إذا كان في حاجه مهمه

المهم وجدت اتصال من هذا الشخص ماسنجر أمس ٨ مساء
فرديت ورحبت به لاجده يطلب مني خدمه معينه
ورديت عليه بالايجاب انه يعمل ايه ويروح لمين وحليت له القصه
وقفلنا وخلاص

الساعه ١٠ بالليل وجدت اتصال ماسنجر من نفس الشخص

قولت هو في ايه ما أنا قولتله يعمل ايه ويروح لمين من طرفي
بيكلمني تاني ليه مش فاهمه وعصبت واتضايقت من الشخص ده لا أحب الزن في المطلق

المهم لما الرن طول قولت رودي
لاجد المتصل مش الشخص اللي بحكي لكم عنه أجد شخص يقول لي يا فندم صاحب الفون ده عامل حادثه علي طريق العالمين ومش لاقين حد من أهله واتصلنا فون بسيده فهمنا انها طليقته قفلت الفون في وشنا
ولاقيناه مكلمك من ساعتين حضرتك قريبته قولت لا أنا مجرد صديقه وكمان مش مقربه
قالي طيب بعد إذنك لو عرفتي تتواصلي مع حد من أهله ياريت تبلغيني وده طلع الظابط اللي اتبلغ بالحادثه وفي المستشفي بيكلمني مستشفي العالمين

ولا أنكر عليكم فضولي جعلني أسأله بإلحاح هو ايه حصله طيب هو كويس طيب هو اصاباته ايه وأمام تحفظ الظابط واصراري معرفه ما حدث القي لي بخبر مفجع فقد توفي الصديق
والبوليس مش عارف يوصل لأي حد من عيلته

شعرت ان هناك مسؤلية فوق عاتقي ولازم أصل لأهله وكل ما اعرفه عن هذا الرجل له ابن توفي وابن مهاجر برا وابن من زوجه تانية مازال طفلا وبرده برا مصر ومطلقها
ما اعرفش اي حاجه تاني
وبعد نص ساعه وجدت رساله من الضابط حضرتك وصلتي لحاجه قولتله بحاول

دخلت اكونت الصديق وراجعت أغلب الكومنتات اي حد حسيت انه قريبه من الرد تواصلت معه عن طريق الماسنجر
لاجد رد من شخصين
الأولي أخت طليقته الثانية والثاني ابن اخوه
وحكيت لهم القصه وتواصلوا مع البوليس علي تليفونه ألف حمد
وذهبوا لمستشفي العالمين
وخلصوا إجراءات الدفن وصلوا عليه الآن بعد صلاة العصر في مسجد المناره بالإسكندرية

وبعد دقائق سيسأل الصديق( أحمد عمر ) 😥😢😢😢😢

ربنا يرحمه ويغفرله ويسكنه فسيح جناته
الخلاصه ما بين الموت والحياة لحظه
ما وجعني بالقصه والمني انه رجل أب لاتنين عنده زوجتين
وعنده أسره والبوليس يتواصل معي علشان اخر حد طلبه ماسنجر أنا واخر حد طلبه فون طليقته التي أغلقت الفون بوجه الضابط كما أخبرني
السؤال هو ايه الحياة دي وايه كم الجحود اللي موجوده بالبشر دي ورغم إني لا أعرفه شخصياً لكن لا أظن أنه شيطان لدرجه ان طليقته أم أولاده الكبار تغلق الفون في وجه الشرطه رغم أخبارها انه بين يدي الله
الخلاصه وعد الله حينما قال ويلا للقاسية قلوبهم
افيقوا واتسموا برقه ولين القلب وستاجرون عليها
ربنا يرحمك يا أستاذ أحمد وينور قبرك ويثبتك عند السؤال ويسامحك
طبعا أنا من ١١ بالليل إلي الآن متابعة الموقف مع الاتنين اللي توصلت لهم من أهله ولما اطمنت انه ربنا أكرمه ارتحت وقولت احكيلكم يوم كان صعب اي حد فينا معرض له
وان الدنيا فعلا لا تساوي جناح بعوضه
حفظكم الله جميعاً

اسالكم الدعاء للأستاذ أحمد عمر ابو ياسين فهو يسأل الآن
التحري

دا منشور منذ يومان بالضبط
تواصلت معها لمعرفة تفاصيل أدق وعرفت بكل أسف تفاصيل مذهلة عن حياته
وكيف عاني الراحل من الجحود ونكران الجميل
والجشع و… مش عايزة البخ
لكن فيه ناس كدا الفلوس عامية عنيهم وربنا سلطهم يوقعوا بين الناس عشان يستفيدوا ويخرجوا مافي قلوبهم من غل
ولا يعلمون أن الله لا يحب إلا العبد الذي يأتيه بقلب سليم
الا من اتي الله بقلب سليم
وسيدنا النبي قال لا يدخل الجنة قتات
قالوا ومن القتات يارسول الله؟
النمام الذي ينقل الكلام علي جهة الافساد يعني عايز يملأ القلوب بالكره ويقطع بكلامه العلاقات بين الناس والرحم
لن يشتم ريح الجنة ولو صام الدهر كله
للعظة
حسبي الله لا إله إلا الا هو عليه توكلت وهو رب العرش العظيم
اجعلوها حرزكم من كل قتات سواء رجل أو امرأة
رد الله كيدهم في نحورهم وسقاهم مما في قلوبهم
إنها لا تعمي الأبصار ولكن تعمي القلوب التي في الصدور

شهيرة النجار