اشمعني توت عنخ آمون ؟ وماهي أهميته حتي يعمل ملحمة فيلمية عنه؟

‏ناس كتير مفهمتش الخبر كويس واعتقدت إن “كريم عبد العزيز” هو اللي هيمثل دور الملك “توت عنخ آمون” والحقيقة ده مش اللي أُعلِن عنه..

‏اللي أُعلِن عنه بوضوح إن الفيلم هيكون في زمنين مختلفين زمن في سنة 1332 ق.م تقريبًا زمن إعتلاء “توت عنخ آمون” لعرش مصر وهو صغير.

‏وزمن تاني في القرن العشرين هتدور أحداثه حوالين إكتشاف مقبرة الملك المصري وكنوزه كاملة وعن محاولة سرقتها من بريطانيا وإزاي تم التصدي للمحاولات دي من رجال الوفد المصريين وإزاي ده أثار الغضب وأشعل الحس القومي عند عموم المصريين ساعتها والزمن ده هو اللي هيظهر فيه “كريم عبد العزيز” وهيلعب فيه دور مهم لسه تفاصيله مش واضحة.

‏ناس كتير استغربت إن البداية في دخول تاريخ الدولة المصرية قديماً من “توت”.. والحقيقة دي تعتبر أنسب بداية لأسباب كتير.. أولاً لسه إحنا معندناش خبرة كافية في الحقبة دي علشان تطلع بأنسب شكل وطريقة وتعبر بحق عننا كمصريين.

‏ولذلك لازم نبدأ بالسهل الممتنع والملك “توت” من أشهر ملوك مصر في العالم كله وصعب الغلط التاريخي فيه ودي هتكون مجرد بداية لدخول عالم مختلف تماماً وحقبة تاريخية لم تمس من الفن المصري يمكن لحد اللحظة بالشكل المطلوب.

‏ناس كتير بتقول هو “توت” عمل إيه علشان يتعمل عنه فيلم مخصوص؟.. هو الحقيقة الفيلم هيكون عن الأحداث اللي حصلت في عهده في المملكة المصرية نتيجة لسياسات أبوه امنحتب الرابع (اخناتون) اللي أفقدت المملكة المصرية نفوذ ضخم وكانت سبب مباشر في إضطرابات دينية وسياسية وصراعات داخلية تنشأ في المجتمع المصري.. وإزاي توالت الأحداث من بعدها.

‏الفيلم ده لو نجح هيمثل نقلة نوعية في السينما المصرية وهتبقى بداية لقصص ملحمية عن الملوك المصريين والشعب المصري في عهد الإمبراطورية المصرية والمملكة المصرية الحديثة وغيرها من الأحداث الملحمية اللي عدت على أمتنا المصرية.

‏الفيلم هيكون بلغتين العربي والإنجليزي وهيتم ترجمته لكذا لغة للخارج وده من ضمن ما تم التوافق عليه في إطار نهج الدولة المصرية لمواجهة حملات المركزية الأفريقية جوة وبرة.

‏هيشارك فيه ممثلين من مصر و ممثلين عالميين وخبراء متخصصين لضمان عدم الترويج لأي خرافات عن الدولة المصرية وتاريخها وشعبنا المصري ولغته وازياؤه وفنه وضمان أقصى قدر من الدقة التاريخية الممكنة والمتاحة وحتى الملامح.

‏الفيلم هيكون من إخراج “مروان حامد” و تأليف “أحمد مراد” اللي اشتغل معاهم “كريم عبد العزيز” في الفيل الازرق 1 و2 و كيرة والجن وهيبدأ تصوير الفيلم في 2025 علشان يأخذ وقته في التحضير المناسب ولضمان المستوى العالمي اللي يستحقه كونه بداية لفيلم مصري عن التاريخ المصري!

شهيرة النجار