بطلة أشهر فيلم اسقاط علي عبد الناصر وحكايات اتهامها لفايزة أحمد بالقتل وزوجها أشهر شرير فن الفاتنة ،قصتها تثبت لك ان الدنيا فااانية

من حبي فيك يا جاري.. يا جاري من زمان… اغنية شهيرة لحورية حسن تقدر تقول انها أشهر أعمالها.. رغم ان حورية حسن كانت مشهورة جدا في وقتها.. ومن كتر سفرها بين البلاد سموها المطربة الطائرة.. لانها بتركب الطيارة كثيرا
من كثرة الحفلات اللي بتعملها.. نقول زي بوسي آه يا دنيا كدا الآن
وأحمد سعد دلوقتي
والبيبي وعبد الباسط حمودة. كانت المطربة الشعبيه الأولي وحلوة ومنافسة لشكوكو
حاولت سعاد مكاوي وغيرهم منافستها
لكن كان مكتوب لها القبول وسط الجماهير والطلب كان عليها بالشهور مقدما
والافراح كانت بتتحدد علي اجندة مواعيدها

زي اللي بحصل الآن مع عمرو دياب وأحمد سعد
اسمها علي البس اي فيلم أو مسرحيه
كان كفيلا بجذب الجمهور
كان لها ملامح شرقية مميزة وعيون ذات حور
تشبه طلة عيون نبيله عبيد
وقران نادر مرصع بالشعبية التي كانت رقم واحد وقت الخمسينات والستينات
مع بحة صوت لا تختلف عليها مميزة
مثيرة شكلا وصوتا
حياها الله بشيء مختلف
لكن تركيزها في الحفلات والسفر أضاع كثيرا من قبولها لأفلام وبطولات.
كادت تضعها في الصف الأول
وانً كانت مطلوبة بشدة ولكن لم تستطع منافسه اسم سعدية ونجاة وغيرهن من هذا الجيل

فعلا وحقيقي

كانت بطلة أشهر فيلم كوميدي. وبطولة لشكوكو
عنبر ولبلب
ذلك الفيلم الذي قيل انه كان اسقاط علي عبد الناصر والعدوان الثلاثي وان لبلب الغلبان هو عبد الناصر
وعنتر القوي هو العدوان الثلاثي
لكن بالحيلة
كسب لبلب الغلبان شمشون الجبار

الفيلم نجح في دور العرض
خفيف لطيف
توليفه شعبي مع بطلة صوتها كان مطلوب
الفيلم بعظم الشطة والطعميه والفول والبصارة المصري المتبل
فنجح بجدارة
ونجحت معه حورية حسن

بس اهو الزمن.. وكل فترة وليها ناسها..

حكت حورية حسن حكاية غريبة حصلتلها ليها علاقة بابن الجيران.. لان والدتها اتطلقت فسافروا طنطا مع والدتهم وبقى المسئول عنهم شيخ قريب امهم.. وجرت العادة ان اللي مسئول عن الأم هو اللي يجيب عرسان للبنات.. من باب انه بيستر عليهم.. ومن باب إنه بيعمل خير ..

المهم، هي طموحة
وعايزة تغني وتمثل مفيش في بالها الجواز دلوقتي..

ففي يوم دخل عليهم الشيخ قريب امها وفي ايده شاب لابس جلابية.. وقالها سلمي يا حورية دا عريسك.. اتقدملي وأنا وافقت مبروك.. طبعاً مفيش رأي العروسة..

البنت رفضت.. راح ضاربها بالقلم وقالها معندناش بنت ترفض..

وحددوا ميعاد الزفاف.. ومن يوم الخطوبة والقلم لحد يوم الزفاف كانت حورية بتفكر تخلص من الشبكة دي ازاي.. .. بس بتبص كدا لقيت مسدس كان والدها
اعطاه لها
يوم الفرح وراحت مطلعة المسدس وضربت نار على العريس واهله.. وهربت على القاهرة… وبعدها والدتها جاءت وراها..

وبعد 10 سنين عملوا زي قعدة للعيلة كنوع من انه خلاص كبرنا ويلا نتصالح.. وحضر الناس فـوجدت من بينهم العريس.. وهو حي يرزق.. تبين ان الرصاص اللي كان في المسدس فشنك.. واتصالحوا واتسامحوا وكل واحد راح لحال سبيله..

هي وفايزة

لكن حكايات حورية دسمة
.. مرة
اتهمت فايزة أحمد في سنة 1961، انها عايزة تسمها.. والقصة ان فايزة عزمت حورية على الأكل.. وحورية أكلت وغادرت لبيتها
وفي البيت شعرت ان بطنها بتتقطع.. جريت ع الدكتور قالها انتي كلتي حاجة حمضانة أو مسمومة

والظاهر ان حورية كانت تعز الاقسام شوية.. من المستشفى علي القسم ومحضر في فايزة أحمد بمحاولة سمها وقتلها.. فايزة قالت.. حورية اختي وصاحبتي.. وأنا عزمتها على الغدا في بيتي.. وهي كانت جعانة جدا.. من كتر الجوع مستنيتش الأكل يخلص.. وفتحت التلاجة كلت طبق المسقعة (في رواية اخرى البامية).. هو كان بقاله كام يوم وأنا كنت هرميه للقطة.. بس هي كلته..وانتهى الموضوع بالتصالح.. وباسوا بعض في القسم وكل روح لحال سبيله..

زين العشماوي

حورية تزوجت من زين العشماوي

أشهر شرير في مسلسلات السبعينات في عز الأبيض وأسود
كان طليق وردة في المسلسل الوحيد اوراق الورد وكسر الدنيا
بشياكته في المسلسل بالبدل المخططه

وكان له ادوار لا باس بها في أفلام كثيرة أشهرها دور الشرير في أدهم الشرقاوي

كان انيق جدا وبيهتم بلبسه قوي…
انجب من حورية حنان، لكن حصل الانفصال، و حصلت مشاكل على رؤية البنت، فتوجهت للقسم حررت محضر ضده مع امضاء بعد التعرض..

وماتت حورية من تلاتين سنة تقريباً في سنة 1994.. بينما زين العشماوي مات قبلها في سنة 1991..

الله يرحمهم جميعا

شهيرة النجار