المنتج الأول : التاكسي Cypercab
عبارة عن تاكسي كهربائي بس من غير سواق ولا تحرش ولا اجرة ولا تارة ولا دواسة ولا فتيس ولا اي حاجة، بتنده عليه يجيلك مبيتأخرش ولا بيتلكك بالطريق ولا بيطلب زيادة ولا بيقولك كاش ولا فيزا ولو فيزا مبيجيش وتقوله وديني الحتة الفلانية هوب يسوق لوحده يوديك وانتا قاعد باشا جوة لو حابب تتعلم اسباني في الطريق هتلاقي وقت عادي.
العيوب المتوقعة في مصر :
١- ملتزم بالطريق والزحام فا مش هيعرف ياخد اختصارات زي انه يطلع محور كمال عامر عكس أو يطلع دائري المنيب من جوا الموقف أو يوصل لمناطق زي المعتمدية من عند الرشاح.
٢- السيستم واقع.
المنتج الثاني : مكروباص Robovan
عبارة عن مكروباص بياخد ٢٠ بني آدم وبردو قيادة آلية من غير سواق مبرشم بيركب بنات قدام ولا الاجرة ورا يا حضرات ولا اللي مدفعش ورا ولا سجاير في رمضان ولا متهدي السرعة شوية ياسطا معانا ناس كبيرة ولا ينزل يتخانق مع اللي رزع الباب ولا بينزلك عند طلعة الكوبري ويقولك الاخر عشان يحمل تاني.
العيوب المتوقعة في مصر :
١- المكروباص اللي مصنوع عشان يشيل ٢٠ شخص هيشيل بعد كدة ٧٦ بني آدم وفاضية كراسي ورا والفيزا مش هتكون شغالة والاجرة هتبقا ورقية وهنستحدث مهنة التباع الآلي للم الاجرة.
٢- السيستم واقع.
المنتج الثالث : روبوت Optimus
عبارة عن روبوت ب٣٠ ألف دولار عشان يبقا خدام عندك بيعملك شاي وقهوة ويحضرلك الأكل ويفسح الكلب وينضف البيت وياخد باله من العيال ويفتح يستلم الاوردرات من سكات من غير زعيق ولا نكد ولا قايمة ولا جمعيات روبوتية ومش هيشتكي ولا هيسيب البيت ولا هنقول عليه الروبوت اللي بييجي ينضف عندنا.
العيوب المتوقعة في مصر :
١- سيتم اعادة برمجته في شارع عبد العزيز لاستخدامه في أغراض اخرى مخطرتش على بال ايلون ماسك نفسه احنا في غنى عن ذكرها هنا
٢- السيستم واقع.
الخلاصة : العالم بيتغير واحنا مبنتغيرش احنا بنتعايش مع التغيير فقط
شهيرة النجار
and then