كتبت كبير مذيعات القناة الخامسة جميلة تلفزيون الإسكندرية غادة الطويل والتي لها من اسمها حظا ونصيب عبر حسابها الشخصي
مايلي
بس الحقيقه الله يرحم أيام الإعلام المصري لما كان هو رائد الإعلام العربي….
يعني أيام صفوت الشريف.
الله يرحم لما التليفزيون المصري كان هو المصدر الوحيد لفترة طويلة….و المصدر الأصدق لأي معلومه أو خبر حتى بعد افتتاح مجموعه من القنوات الفضائية.
![](https://hikayat-shahira-elnaggar.com/wp-content/uploads/2024/07/IMG-20240721-WA0008.jpg)
الله يرحم قطاع الانتاج باتحاد الإذاعة و التليفزيون….و الله يرحم إتحاد الإذاعة و التليفزيون نفسه…
كان فيه أسطورة في عالم انتاج المسلسلات اسمه “ممدوح الليثي”…اللي كان الممثلين من أكبرهم لأصغرهم بيتوددوا إليه علشان ينولوا رضاه….و بالتالي يدخلوا بيوت المصريين من خلال أقوى المسلسلات…
ده كان فيه مسلسلات بتقعد الناس في بيوتها يومياً وقت عرضها .
الله يرحم ماسبيرو لما كان خلية نحل…
أنا عاصرت الأيام دي
كنا نطلع كافيتيريا الدور العاشر….لازم لازم نلاقي حد من المشاهير قاعد بيتكلم في شغل مع مجموعة عمل…. أو بيتغدوا أحلى سكالوب بانيه في البلد كلها
شوفت هناك اثار الحكيم….و أسامه أنور عكاشه..
و ممدوح عبد العليم….و فنانين كتير…و مؤلفين…و مخرجين…و مذيعات ….
![](https://hikayat-shahira-elnaggar.com/wp-content/uploads/2024/07/IMG-20240721-WA0009-1024x1009.jpg)
كان الوزير لما ييجي له ضيوف من جوة أو برة مصر….يعزمهم في الكافيتيريا دي اللي شايفه النيل و مصر كلها من فوق…و بتقدم أحلى أكل….و جنبها المخبز بتاعها اللي كان بيعمل أحلى مخبوزات…تشموا ريحتها من بعيييد.
كان فيه قيادات….قيمه و سيمه زي ما بيقولوا….
قامات إعلامية….قديرة….و شاطرة….
إيه اللي حصل بقه؟ و مين عمل فينا كده؟
ليه عملوا فينا كده؟
والله اللي حصل لنا ده أنا اسميه “قتل عمد”….
أصل القتل مش بس رصاص ولا سكينه…
قتل الروح ….و قتل الإبداع….و كبت الناجحين و تحويل نجاحهم فشل….ده برضه قتل.
من سنة ١٩٩٠ سنة افتتاح القناة … إلى سنة ١٩٩٩….تسع سنين متتالية….القناة الخامسة كانت بتاخد ترتيب “الأول” على كل القنوات التليفزيونية…
القنوات الأم (الأولى و التانية) بعد فترة من نجاحنا كانوا بيقلدوا برامجنا….و ساعات بياخدوها باسمها….حصل مع برنامجي “للشوارع حواديت”….اتتاخد كده باسمه ….و لما اشتكيت لأستاذ وائل عبد المجيد (الله يرحمه)…..قاللي ولا يهمك….ده في حد ذاته نجاح….و اللي حواديته أحلى الناس حتتفرج عليه.
![](https://hikayat-shahira-elnaggar.com/wp-content/uploads/2024/07/IMG-20240721-WA0010.jpg)
أنا مش عارفه مين اللي لغى وزارة الإعلام؟ و ليه اتلغت؟
بس من يوم ما اتلغت مشوفناش حاجه عدله.
الدنيا حوالينا بتتطور بسرعه شديدة….واحنا مكانك سر
كاميراتنا هي… هي …من سنين السنين
الستديو هو …هو… بدون تطوير
العربيات كانت جايه لنا أصلا مستعمله من القاهرة و اشتغلت تلاتين سنه كمان…و خلاص مبقاش ينفع فيها تصليح…
ماكينات المونتاچ متهالكه….و أغلب المخرجين بيمنتچوا في بيوتهم على اللاپ توپ
أنا بقه نفسي اسأل سؤال لأي حد بيفهم في التسلسل الوظيفي…
لما يكون فيه منصب …مثلاً مدير….و المدير ده له نائب بقاله سنين….و المدير ده يمشي….الطبيعي يحصل إيه؟
الطبيعي ان النائب يتصعد للمنصب اللي اتدرب عليه بقاله فترة مع مراعاة طبعاً الاقدميات.
انما أنا عايزه أقول لكم نكته….بس مش بتضحك.
رئيس الهيئة الوطنية للإعلام انتهت فترته….و خلاص مبقاش رئيس الهيئة
..بس لسه قائم بأعمال رئيس الهيئة…ليه بقه؟ ماسبيرو خلاص مبقاش فيه ناس مؤهلين؟ مش عارفه
و المنصب اتعرض على أحد الأشخاص…و كان المفروض ياخد المنصب و يحلف اليمين الأسبوع اللي فات….لكن فجأه محصلش…فأصبح المكان فاضي
و رئيس التليفزيون….برضه بقالها كام سنه قائم بأعمال رئيس التليفزيون….طيب ما تسكنوها بقه على المنصب…..
لأ….قائم بأعمال
و كذلك رئيس قطاع القنوات الإقليمية….قائم بأعمال….ليه؟
مفيش حد يتعين في المنصب ده؟
لأ فيه….بس مش عارفه ليه محدش اتثبت عليه….برضه قائم بأعمال…
حتى رئاسة القناه عندنا هنا في إسكندرية…
رئيس القناة طلع معاش…..و الحقيقه انه مطلعش معاش فجأه….كان المفروض قبل ما يطلع معاش يكون رئيس القناة اللي بعده متحضر و معروف….انما رئيس القناة طلع معاش في شهر مارس….و احنا قربنا على أغسطس و برضه مفيش رئيس…فيه زميل قائم بأعمال.
هو فيه ايه؟ ما أكثر الكفاءات في ماسبيرو….
ايه اللي بيحصل ده؟
و المشاهد يقول لك انتو مش بتتطوروا زي القنوات التانية ليه؟
عارفين سبب الپوست الطويل ده إيه؟
النهارده الصبح كان عندي حلقه ….و نزلت كالعاده من البيت الساعه ٨ إلا ربع…و عربيتي مع ابني فأخدت تاكسي…
و سألني سائق التاكسي هذا السؤال…..انتو ليه يا استاذه مش بتتطوروا زي القنوات الفضائية؟
و حكيت له بقه هذه الحكاية على ما وصلنا التليفزيون….و انتهينا إلى هذه النتيجة….
الله يرحم زمان ….و أيام نجاحنا زمان…لما كان فيه قيادات إعلامية بجد….خايفه على نجاح كل برنامج بيطلع على الشاشه….و بتشجع الناجح ينجح أكتر….و بتراعي كرامة و حقوق العاملين من الوزير للغفير.
و اللي احنا فيه ده….اسمه سمك….لبن….تمر هندي.
ربنا يطلعنا منه على خير ان شاء الله🙏
شهيرة النجار