كتب نجل الإذاعي اللامع الراحل وأشهر من قدم البرامج الدينية علي شاشة التلفزيون الراحل أحمد فراج صاحب البرنامج الأشهر نور علي نور
والذي استضاف فيه قامات الدين والعلم في مصر
كتب الدكتور محمد أحمد فراج
رحل في نفس اليوم الذي ولد فيه!
رحل من علمني ان الظلم ظلمات!
رحل من علمني ان العفو عند المقدرة، رحل من علمني ان الجنة لا يدخلها متكبر أو فاجر أو منافق.
رحل من علمني أن العدل هو ميزان الحكمة، رحل من علمني أن أنهي النفس عن الهوي كما أمرنا الله في القرآن.
رحل من علمني أن أعطي أي شئ لأي محتاج و لا أنتظر المقابل.
تاجر مع ربك يا ابني ! كان دائما يقولي كده.
لا تنتظر الشكر من أحد. دور علي رضا ربك مش عباده. عباده مش شاكرين نعمه فهل حيفتكروا أي فضل لأي إنسان عليهم. إلا من رحم ربي.
رحل من قال لي عامل الناس كما تحب ان يعاملوك لا كما يعاملوك.
دور لهم علي عذر دايما! يمكن يا ابني ملقاش حد يربيه معذور، أو إتربي بس شيطانه بيسوقه ، سيبه لربه يهديه .
يا ابني أنا بحاول أعلمك أنت و أخواتك أخلاق الرسول، لأنه كان خلقه القرآن !
أنا عارف انه صعب لأنك في الاخر بشر! و ده طبيعي، جواك الخير و الشر.
بس معلش يا ابني أفضل حاول دائماً تبقي كويس و لو الشيطان غلبك مرة ، قول أعوذ بالله منك يا ملعون. متخليهوش يفرح فيك ، خلي ربنا يتباهي بيك يا محمد.
إياك يا محمد أنت و أخواتك تظلموا حد أو تفتروا علي حد ، القرش اللي معاك مش بتاعك ! ربنا بعتهولك علشان حد تاني ، يمكن عشان أمك، مراتك، عيالك، أخواتك ، أو أي حد محتاج.
واي نعمة جتلك فهي هدية من الله مش عشان شطارتك أو عشان أبوك.
روحك هدية ، النفس اللي بتتنفسه هدية ، كل حاجة عندك هدية من ربنا و حيسئلك عليها يوم القيامة! عملت ايه باللي بعتهولك، حتي صحتك حيسئلك عنها.
اوعي يا ابني تطلب منصب و اوعي تنافق اللي فوقك لان في فوقه ! مش مدير تاني لا يا ابني ربنا فوق الكل روح له دائما، أطلب منه بأي لغة أتكلم حيفهمك.
، محمد يا حبيبي اي حاجة تعوزها أو طلب روح و أتكلم معاه ، و لله جنود حيبعتهم ليك وقت ما هو يعوز،
بس خليك معاه هو عمره ما حيسيبك ، بالعكس في أسوأ الأوقات حتلاقي أقرب حد ليك و أكتر حد حيسندك و يفك كربك هو ربنا.
احترم الناس، الصغير قبل الكبير اوعي تتكبر علي حد يا محمد الكبر من الشيطان .
رحل أبي الذي علمني و رباني و أحسن اليًَ و علمني حب الله و رسوله. علمني الرحمة و التواضع علمني كل ما هو طيب لانه رجل طيب.
اللهم اني أُشهِدُك و أُشهِدُ ملائكتك و جميع خلقك ان أبي رباني و أحسن تربيتي في طاعتك، و ان قصرت فإنه لتقصير مني.
اللهم انه ضيفك و أنت الكريم العفو الرحيم ، أثق في رحمتك كما علمني أبي اللهم عامله بما أنت أهل له، يا حي يا قيوم.
اللهم اقرئه مني السلام،
السلام عليك يا أبي و رحمة الله و بركاته أنتم السابقون و نحن ان شاء الله بكم لاحقون.
شهيرة النجار
and then