لو بصيت علي شخصية لوسي ابن طنط فكيهة وإخراجها أنها هايفة ومالهاش لازمة ومحل للسخرية والتنمر ….حتلاقي انه العكس تماماً وكان أحسن شخصية في الفيلم
متعلم في أوروبا من وهو صغير …بيجيد أكثر من لغة …مثقف فنياً عارف كل الأغاني الأجنبية بكل اللغات
الوحيد اللي كان بيشتغل حاجة بيحبها ومحقق شغفه وعايش حياته
ومبسوط …..يعني بيشتغل مدرب رقص وواخد ماجستير فيه من أوروبا وبيكسب كتير وبيلف أوروبا وأهله أصحاب
ثروات ….عنده إمكانيات شخصية وعائلية تمكنه يكسب أضعاف ما بيكسبه حسين في الوظيفة.
فين الهيافة والفشل ؟؟؟
البنات كلها بتحبه ….وشخص لطيف و زوق ويوسف وهبي دايما يوصفه بابن طنط فكيهة……عشان هو لطيف بيحب أمه وقريبته …..ودايما يقولها كلام حلو …..عكس عمر الشريف ( حسين ) اللي كان جلف وقليل الذوق ومش بيعرف يعامل اي ست كويس حتى مرات عمه.
لوسي كان علي علاقة بكل نخب البلد ومشاهيرها …..وكان صديق شخصي لحارس منتخب مصر ….يعني شخصية تستحق الثقة أكيد مش هايف ولا حاجة.
هو الوحيد اللي كان مش مصدق علاقة حسين بهند رستم…..يعني واحد عنده ذكاء إجتماعي مش ساذج ولا تافه عكس كل اللي صدقوا القصة ورددوها.
وهو اللي كشف الكذبة بعلاقاته مع المشاهير .
شخصية لوسي بتوضح تفاهة المجتمع هنا مش تفاهته…..اللي هو مهما حققت في حياتك الناس مش حتحكم عليك غير بشكلك الخارجي
يعني هو كان أصدق واحد في الفيلم ….متعدد العلاقات النسائية وبيعلن ده …..
عكس جوز خالته اللي كان يحتقره وهو كان بيخون مراته في السر وبينافقها وهو مش طايقها وجوز خالته نقل ده لابن أخوه ويقوله اتدردح .
خليك راجل محترم في نظر المجتمع ….تبقي جلياط وخاين وبتختار أي واحدة تتجوزها والسلام وتخونها مع ألف واحدة في السر …..بس ارسم صورة يحبها المجتمع عنك بقا .
أوعى تلبس قميص مشجر ملون ….
أنت كدا مش راجل كويس !!!
شهيرة النجار
and then