“حميدو الفارس” من أشهر فتوات بحري ، واللي أخد اسمه فريد شوقي في فيلم حميدو .. بفرمان خديوي

مش هنتكلم عن الساحل ولا حفلات الساحل
خلينا في زمان وإسكندرية
نسيب الساحل لأهله لانه بيجيب الضغط

سبب تسميته بالفارس

انه كان كل سنة بيحصل مسابقة تجديف بين رأس التين والسياله وكان اللي يكسب بينهم يبقي اسمه زعيم بحري وكان مهرجان مشهور كتير بين أهالي بحري زمان ..

كان بيمثل رأس التين واحد مجدع اسمه طلبة واللي بيمثل السيالة واحد اسمه الدكش ، المهم ان الدكش كان في وعكة صحية قبل المهرجان ، فأهالي السيالة راحوا لحميدو علشان يلعب مكانه وقد كان لعب وكسب ..

وقتها كان الخديوي عباس حلمي التاني بيتفرج علي المهرجان و كان اهالي رأس التين بيهتفوا “سيالة ياسيالة ياللي مفكيش رجالة” وأهالي السيالة يهتفوا “وقة ملح وقة طين علي دماغ رأس التين” ..

لحد مالاجواء اشتعلت بينهم و وقف حميدو بينهم وفض الالتحامات ، أعجب الخديوي بشخصية حميدو و رماله ريالات فضة ع الأرض ك اكرامية , التاني اعتبرها إهانة له وعدي عليها ومشي ومخدهاش ..

الخديوي غضب واستدعي حميدو للقصر بتاعه وخلاه يبارز خادم أفريقي عنده قوي البنيان و ضخم الجسم ، حميدو وافق وقاله “علي الله ياافندينا” ..

أول ماحصل الاشتباك حميدو اداله “روسية” واحدة اللي بسببها “طب التاني ساكت” .. ومن هنا سماه الفارس واكتسب لقب “حميدو الفارس” بفرمان من الخديوي

شهيرة النجار