أقابل كل يوم بشر يستحقون الكتابة عنهم
و لكن كنت أري أنهم لايريدون الظهور
قصة تلك السيدة أجبرتني علي تسطير تلك السطور لعلنا نتعظ ونعلم أن الدنيا لا تساوي شيئاً
قابلتها في أكتوبر الماضي مصادفة في سوق خضار كيلوباترا
أنا واقفة اشتري من سيدةبعض الخضار
مرت سيدة نحيفة طويلة سمراء البشرة بشوشة
قالت للسيدة التي تبيع عايزة شوية ملوخية خضراء؟
البائعة قامت بعمل حزمة كبيرة لها
ردت السيدة السمراء لا عايزة شوية قليلين انتي عارفة أنا عايشة لوحدي
دول بس وتركت الباقي
جذبتني بعفويتها ولفتت انتباهي وأنا أري البائعة تتحايل عليها تأخذ ما تريده من الخضار
رفضت وسارت لحال سبيلها
قلت للبائعة أنا هدفع ثمن الملوخية عنها
ردت البائعة لا
إحسان تاخد اللي عايزاه من غير حساب
إحسان علي قدها واحنا كلنا بنسند بعض
شفتم البائعة البسيطة وكرمها رغم فقرها هي الآخري
هرولت خلف الست إحسان وقلت لها تعالي اشتري لك فاكهة؟
نظرت لي من فوق لتحت نظرة بتقول فاكهة اي يا أمّ فاكهة
وقالت ولا تلزمني مش عايزة كدا رضا
ياربي هو فيه لسه ناس كدا
وقفت معها أتحدث واضحك لأزيل الكلفة وأحاول مساعدتها باي شيء
فين وفين لما ضحكت لي
قالت لي أنتي فاكراني صغيرة ؟
أنا 90 سنة بس مش باين عليا لان مش بأكل كتير
ومش عايزة من الدنيا حاجة
جوزي توفي
ولم أنجب وماليش حد
كل أهلي توفوا
منتظرة لقاءه
طب ياست إحسان أنتي ساكنة فين؟
أخذتني من يدي وأشارت للمنزل الذي تقطن فيه
وأخذت تستحلفني أطلع معها نأكل لقمة
شفتم الناس
مرة تانية يا ست إحسان
أوعدك هجي لك
وبصعوبة شديدة قبلت علي إستحياء ما خرج من ذمتي لها
أخذت تدعو لي وتقول لي لعلمك أنا مش باخد من حد حاجة مستورة
الناس هنا في السوق بيعطوني ما أريد
وناس ولاد حلال طلعوني عمرة
ربنا مادد أيده معايا
لم أتمالك نفسي وقمت باحتضانها وتقبيلها
الست بكت
وقالت أنتي بتبوسي ست زيي
قلت لها وأنت مالك يعني؟
قالت لبسي مش أوي وعلي قدي وأنتي باين عليكي ست..
قلت لها عيب كدا هزعل منك كلنا ولاد تسعة وزي بعض
بكّت أكثر
وظلت تدعو لي فرحت جداً
بل ابتهجت
هي ماتعرفش ان أنا اللي محتاجة دعوتها وقبولها ليا
قلت لها ممكن نتصور مع بعض للذكري؟
ضحكت كالاطفال وقالت أنا؟
وباندهاش الأطفال سلمت نفسها للموبايل نلتقط معا صورة
نظرت للصور وفرحت جداً
وسلمت تاني وتالت ومشيت
عدت للبائعة اسألها عن الست إحسان
فكانت المفاجاة انها قالت لي كويس انها وقفت كلمتك دي مش بتكلم مع حد خالص وبترفض تاخد حاجة من حد.
عزيزة النفس أوي
واحنا اللي بنتحايل عليها تطلب
ويا بخت اللي تقف علي فرشه وتطلب منه حاجة
فتحت فمي مذهولة بجد؟
قالت والله اسألي كل السوق
الدنيا ولاهي في بالها
أمس كنت عند البائعة اشتري بعض الخضار.
وجدتها تقول لي فاكرة إحسان الطيبة؟
قلت لها طبعا دا حتي كنت هسألك عنها
ردت توفت في حجرتها 8 أيام ومحدش عرف انها توفت إلا لما الريحة طلعت
والجيران كسروا الباب ودفنت الجمعة الماضية
الناس كلها زعلت عليها
الست دي كانت من عفة نفسها وفقرها كانت بتدينا دروس في الدنيا من غير ما تدري
واللي كانت تقبل تاخد منه حاجة بيكون يوم سعده بيخلص كل حاجته وتجبر معاه
واللي تدعي له ربنا بكرمه
واللي تزعل منه بيشوف العجب
عشان كانت بركة السوق
الكل حزين عليها
دي قصة واحدة من أهالينا الطيبيين الفقراء الراضين القانعين الذين جاءوها بدون شيء وخرجوا منها بدون شيء
فهمت الدنيا وانها دار امتحان
زهدتها وتركتها فكانت الدنيا تقبل عليها وهي تتركها
حتي في فقرها علمت كل من حولها
حتي في عوزها علمت كلّ الأغنياء والطامعين ان الدنيا ولا تساوي جناح بعوضة
في سلام الله يا ست يا طيبة بنِت الأرض الطيبة
شهيرة النجار
and then