الغالبية مطبلاتية لا استثني كثيرا هكذا قالت لي سيدة مجتمع ،، قلت لها مش للدرجة فيه ربع يعرف ربنا، وحكاية البعض من اللي عامل جمعيات ورؤساء أندية رؤساء جمعيات خيرية،، اي جاب دا لدا برستيج بقا ومصالح يا عزيزي!!!!

كلمتني سيدة مجتمع روتارين قديمة
قالت لي ما كتبتيه عن عالم المطبلاتية ينطبق علي مجتمعات كثيرة في مؤتمرات بعض سيدات الأعمال واللي بشوفه في بعض ملامح سيدات هذه المجتمعات
بالضبط لدرجة تركت ذلك المجتمع

حاجات تخلي الأعمي يفتح
وكله بيوالس لكله وكله بيطبل للآخر عشان مصلحة جايا من وراه
واللي يدخل نادي عشان يظبط شغل في جهات هامة أو يشبط في ايه أو يخلص شغل ايه أو …
قلت لها شفت وشايفه وعارفة وياما كتبت ما اخدتش غير الهجوم والحرب
قالت مظبوط.
بدليل كان العدد كام بقا كام في نوادي عمل مجتمعي
أردفت لها وحتي لا تظلمي هذا المجتمع أيضاً الناس أو السيدات اللي كل واحدة عاملة جمعيه وتلم من وراها تبرعات للجمعية وتتمحلس للمسؤولين والناس الأثرياء للتبرع سبيني ساكتة وحاطة في بقي. …
دا أنا ليا موقف مع سيدة شكت لي ان رئيس نادي أسبق ماسك حالياً رئيس جمعية أيتام وإنها مرت علي الجمعية لقتها متبهدله وطلبت أتدخل لأنها عايزة تساعد الأيتام دول وتعطيهم متطلبات لكن أمينة صندوق الجمعية دي واقفة ضد ذلك
المهم قلت لها طب ما تكلمي رييس الجمعية دا اللي هو كان رئيس نادي شهير ؟
قالت أنا بحاول أعمل للبنات خروجة حلوة ونشوف هيعملوا ايه معايا في الجمعية دي
أصل لميت فلوس كتير من سيدات هنا وكان ممكن أخذها لجمعيتي؟
جمعيتك؟
أنتي عاملة جمعية؟
آه وبكفل أيتام في بيوتهم
والله؟
يعني هي كل واحدة لازما تعمل جمعية وتكفل أيتام ؟!! مش دي الجمعية اللي في المكان الفلاني؟

وشها أحمر واكفهر ومن يومها وهي تشوفني عايزة تولع فيا اليجنت بقا وعندها جمعية ورئيس لجنة يا اخواتشي
قوم أنا كلمت رئيس النادي السابق اللي هو رئيس جمعيه أيتام حكومية برضك معرفش صلة دا بدا اي مع انه مقاول كبييير والزهر لعب معاه علي الآخر
واي جاب دا لدي
ومنطق وأبجدية الضمان الإجتماعي في الاختيارات علي أساس اي؟

وهل عنده وقت هو أو غيره يشوف ولا تاركها لحد يدير؟
المهم كلمته قلت له الست فلانه بتقول علي جمعيتك كذا ووعدتني تعطيني صور لمنظر البنات عندك حاجه تقطع القلب ولم ترسل لي شيء
هو طبعا أنكر وشجب وهعمل لك زيارة تشوفي بنفسك
الكلام دا من سنه كدا
وطبعاً ولا عمل ولا يحزنون
والست تشوفني تقولش عدوتها وعاملة في وشها البدع رجعت خمسين سنة لورا
أصل البرستيج حلو وبيحتاج اهتمام

بكل أسف كله بطبل لكله ويستقوي بكله للمصلحة ولما تخلص المصلحة بخ
شفتي موظفين كتير طلعوا محدش برفع السماعه عليهم إلا إذا كان لهم ذرية ذات منصب؟!!
قلت لها طبعاً كتير
وشفت مسؤولين طلعوا والناس العرة بعدت عنهم ولما اشتغلوا بعد ماخرجوا من الخدمة في حاجات مهمة رجعت الناس ال…. يمسحوا لُهم جوخ تاني وانت حبيبي وأنت أبوك صاحبي وحاجات كدا
مجتمع الماسك علي دينه ومبدأه قليل جداً
قلت لها أنا بشوف العجب
وشفت
وبشوف طب شفتي. لما بظبطوا مع بعض ينزلوا انتخابات أندية وكدا ووعود دا يمسك لجنة إيه ودي تمسك ؟
مع أنه عمل عام بدون أجر لكن عارفين يستفيدوا إزاي
شفتي فلانة كل ما مديرها يتغير ويجي جديد تعمل له ندوة في النادي اللي هي فيه مسؤولة وهات صور ودرع وبيتي فور ويلا بينا وبتجبر وتظل في منصبها العملي الاستثنائي براتب استثنائي وأهي ماشية كله بظبط لكله وكله باللي يقدر يطبل بيه يطبل ماهو يوم تطبل ويوم بتطبل لك واهي ماشية

سبيني ساكتة ويقولوا شهيرة فاضحة الناس ؟!!! دي اللي هي أنا!!!!!!

شهيرة النجار