الخميس, يوليو 18, 2024
شارك المقال

شاب مصري كان مشترك في موقع إباحي لمدة 5 سنوات بـ500 جنيه ..
الموقع بيبعتله علي ايميله كل يوم صور ومقاطع إباحية..
هو من كتر ما كان مُعجب بالموضوع لم صحابه و عرّفهم على الفكرة بكل فخر وفرّجهم على الحاجات اللي الموقع بيبعتها ..
هما كمان إنجذبوا للموضوع فقرروا يشتركوا ف الموقع
قالهم لا وتشتركوا ليه مانا مشترك ..
أنا هضبط إعدادات إيميلي إن الرسالة اللي تجيلي من الموقع ده يتعملها إعادة تحويل وتتبعت ليكم كلكم على ايميلاتكم
وقد كان..
فضلوا على الحال ده 6 شهور .. وبعدها الشاب ده عمل حادثة ومات!
صاحبه بيحكي إنه لما رجع من الجنازة لاقى رسالة مبعوتاله من إيميل صاحبه الميت بالصور والمقاطع الإباحية!
صحابه بعتوا للموقع إن صاحب الإيميل ده توفى فياريت تلغوا الرسائل اللي بتتبعت.. كان رد الموقع إنه ماينفعش تتلغي قبل نهاية الاشتراك!..
الاشتراك اللي لسه هيكمل 4 سنين ونص !!!
4 سنين صعب جداً يكونوا صحابه بالوفاء اللي يخليهم مايفتحوش الرسائل في لحظات ضعف أو رغبة أو عصيان!
فـ فضل الحال على ماهو عليه.. الشاب ف القبر بيتحاسب والذنوب عمالة تكتر عليه.
نفس الفكرة دي بنعيشها ف قصص كتير من غير ماناخد بالنا
وهى السيئات الجاريات تخيل أنك تكون شايل ذنوب وأنت نايم
وعداد السيئات شغال مع كل شخص كنت سبب انه يمارس الذنب رغم انه هو ال عمل بس أنت كنت سبب !
البلوجر ال بتفرح ان عندها متابعين ملايين عشان عملت فديو فيها مشهد وجسمها كله فتنه للشباب !
والبلوجر ال فرحان ان عامل قناه هو ومراته وفرحان ان عنده ملايين المشاهدات وبيقدم محتوى فساد أخلاقي !!
وال عامل قناه على يوتيوب وفرحان ان نزل أغنيه شافها ملايين المشاهدات !!!
ال شغال سيشن وفرحان ان بينزل صور العرايس ف الصفحات
وان بيشوفها ملايين الناس!
ال شغال فى الملابس والمكيب ارتست وبينزل موديلات الصور وصور فاضحه وفرحان ان عنده زباين كتير !
ال بيتجوز وجايب رقصات فى فرحه وخلى كل حد حضر شاف المنكر هيشيل شيله كبيرة فى ميزانه!
مشاهد كتير فى حياتنا خاف منها دا حتى لو أنت رحت تجيب لشخص سجاير أنت شاركته الذنب
أمور أنت شايفها من بعيد كلام عادى بس والله الذنوب بتأكل الحسنات ويعيش الإنسان فى معيشه ضنك وضيق
اغتنم أيامك بالاثر الطيب وجاهد بنفسك فى كل الأمور
جاهد بنفسك وقاومها على الطاعة والعبادات
جاهد بنفسك بترك المعاصى وأنك تكون سبب لكل خير
جاهد بنفسك بترك اثر طيب وأنك ما تشارك ذنب مع أشخاص
اللهم اعنا على ذكرك وحسن عبادتك
ودايما تذكر قول الله عز وجل
(وَلَيَحْمِلُنَّ أَثْقَالَهُمْ وَأَثْقَالًا مَّعَ أَثْقَالِهِمْ ۖ وَلَيُسْأَلُنَّ يَوْمَ الْقِيَامَةِ عَمَّا كَانُوا يَفْتَرُونَ )

كان لازم تعمل الذنب ، اعمله لوحدك ..
ماتقنعش حد بيه ، ماتحرّضش حد عليه
أنت بعد فترة ممكن تتوب ..
ممكن تبطل كل الذنوب وتبقى من الصالحين كمان..
بس ساعتها مش هتعرف تجري ورا كل واحد نقلت له العدوى وعوّدته على الذنب ده وتخليه يتوب
ولو عرفت تجري وراهم كلهم مش هتعرف تقنعهم بإنهم يبطلّوا حاجة اتعودوا عليها خلاص لمجرد أنك بطلّتها.

زي ما في صدقة جارية فيه ذنوب جارية
احرص على الأولى واحذر من التانية

شهيرة النجار

وسوم

Welcome to حكايات شهيرة النجار

Install
×