الخميس, يوليو 18, 2024
دفتر احوال مجتمع مصر

علبة حلاوة المولد النبوي ب 30 ألف جنيه بتاعة الأكابر!!! حلاوة أكابر بقا هي جت علي دي!!

شارك المقال

في زمن هًو زماننا تجد كيلو حلاوة المولد ب 140 جنيه
وفي مكان ب 200 جنيه
ولو من عند محل مفتخر بألف جنيه
لكن علبة حلاوة المولد تباع في محل مصري مصري داخل مصر ب29999 جنيه!!!
آيوا الرقم صح
ليه؟

وعشان ايه؟
عشان الأكابر يشتروها ويهادوا بها الأكابر اللي زيهم؟!!
أم توضع في مكاتب الأكابر ويدخل الناس والضيوف والزباين يقولوا لهم افتحوا خدوا حاجة حلوة من حلاوة المولد كل سنة وأنتم طيبين

فاللي حاضر يعرف ان صاحب المكان كبير
مش كدا برضه
مش الأكابر برضه بيعملوا دايت؟!!
ولا بيأكلوا حاجات حلوة؟!!
ولا جت علي دي ويرفعوا شعار الدين ان الله يحب أن تقام شعائره؟!!
طب هو أنتم بتصلوا علي سيدنا النبي؟
تعرفوا سنته؟!
تعرفوا ان ال 30 ألف جنيه دول يفتحوا بيوت؟!!
طب ما تعلموا بفلوسها صدقات لوجه الله

ولا جت علي علبة الحلاوة دي!!

أنتم برضه اللي بتعملوا أفراحكم الفرح يعدي 10 مليون جنيه
وأنتم اللي شاريين الفيلات في زايد والتجمع ومراسي ب 200 مليون جنيه
وأنتم اللي بتعملوا عزومات الواحدة تكلف مليون جنيه
وأنتم اللي راكبين البورش والماي باخ ام 7 مليون جنيه
وأنتم اللي بتشتوا في دبي ونص صيفكم علي يخوتكم وأوربا بملايين الدولارات
وأنتم اللي بتطلعوا تعمًلوا شوبينج من لندن بملايين اليورو هات
وأنتم اللي بتعملوا نعي لحماة جارة بنت عمة الوزير ب 200 ألف في الأهرام
وأنتم اللي بتتبرعًوا أمام الكاميرات بملايين
ولو حد قال لكم فيه حد مريض وبنلم له تقولوا ربنا احن عليه مننا يصبر

فعلا وماصبرك إلا بالله

علبة حلاوة مولد ب 30 ألف جنيه
هو التعويم وأزمة البصل والطماطم وصلوا لحد دي

طب هو تمن علبة الحلاوة دي يشتري كام كيلو بصل؟!!
طب دار الافتاء فين وشيوخها من علبة الحلاوة دي
ما تخدش فتوي حلوة كدا؟!!
زي فتوي لا ضير من تبادل الحلوي في المولد النبوي الشريف؟!!
ايووووه يا جدعان
دا احنا مش هيقبل احتفالنا بقا من غير العلبة دي

شهيرة النجار

Welcome to حكايات شهيرة النجار

Install
×