من امن العقاب أساء الأدب : مجلس الوزراء يصدر بيانات أسعار سلع نزلت كل ساعة والسوبر ماركت له دولة أخري

نزلت سوبر ماركت
دخلت علي استاند الزيوت وجدت السوبر ماركت الكبير واضع سعر صنف واثنين علي الزيوت
الباقي لا يضع تسعيرة له
طلبت أحد العاملين سألته
سعر الزيت دا كام؟
رد مش عارف ممكن علي الكاشير
ليه مش واضع تسعيرته عليه؟
لان يا مدام كل ساعة له سعر

رديت معقولة؟
دا الحكومة انبارح وانهاردة قالت سعر الزيوت نزل ل 80 جنيه اللتر
رد بكل أريحية الحكومة حرة تطلع البيانات اللي عايزة تطلعها لكن عندنا الصنف دا كل ساعه بسعر
رحت عند الكاشير.
ممكن سعر صنف زيت كذا؟
ظل قرب الربع ساعة يبحث أمامه لم يجد سعر له ولا حتى اسمه
فقال ممكن نجيب زجاجة ونشوف الكود
استحضر زجاجة وجد ان السيستم للسوبر ماركت واضعها برقم الكود وليس اسمها وثمنها 110 جنيه تقول مش بتكشف علي حد!!
قلت له ليه؟
دي في ماركت فلان ب 90 جنيه وفي كارفور ب100 والجمعية تبيع الصنف دا ب 79 جنيه
اشمعني أنتم ؟

رد بكل ثبات عندنا كدا
وقس علي ذلك أصناف المكرونة
الأرز
حتي الكمون بتاع بلدنا أفخر صنف الأسواني اللي كان ب90 جنيه بعد الغلا والكوا
وحتي عامين كان الكيلو ب30 جنيه وصل سعره 450 جنيه
هو الكمون كمان بقا بيستورد كمان بالدولار؟
دا بتاع بلدنا؟!!
والي المركز الإعلامي لمجلس الوزراء
أناديهم رجاء حار
بلاش بيانات كل ساعة
والواقع غير كدا
بتطلعوا البيانات دي لمين؟
التجار بعامليهم عندهم تبجح ولافارق معهم عقاب ولايحزنون
أنهم كونوا لأنفسهم دولة داخل الدولة
والسلام عليكم ورحمة الله

شهيرة النجار