وتطلع تقول ماتعرفش تدخل حمام ولا تشرب فنجان قهوة في الفنادق دي !! جاملي هشام بس بعيد عن قصة القهوة دي إلا القهوة!!

منذ أول أمس وأنا مش قادرة أتمالك نفسي للرد علي جملة واحدة فقط لا غير ذكرتها الصحفية أولا والمذيعة الأولى حالياً ثانياً لميس الحديدي وهي تتكلم في موضوع صفقة بيع هشام طلعت مصطفي لجزء من نسبته التي اشتراها من مجموعة فنادق تاريخيّة لشركة إماراتي بمبلغ 800 مليون دولار
دا مش موضوعنا لأن الكلام في السياسة صعب
لكن الجملة التي بررت بها لميس عرض أولد كتاركت أسوان
وماريوت الزمالك
وسيسل محطة الرمل مثلاً
درة تاج فنادق مصر
ان الفنادق دي صعب تدخل فيها حمام !!! اي والله
وصعب تشرب فيها فنجان قهوة!!!
اي والله
لان قدمت
متهالكة
والحكومة بالصريح لا بتعرف تدير ولا عندها فلوس تجدد!!

أنا بقا من تجربة سيسيل محطة الرمل الكورنيش دا كان تبع شركة كبيرة لزهير جرانة وزير السياحة الأسبق
الفندق أصلا فولي بوكد صيف شتاء وصعب تلاقي فيه حجرة
فنجان القهوة فيه ب 50 جنيه
المكان 7 نجوم حرفياً من شياكته
والحمامات عجب من النظافة
وكأنك دخلت التاريخ!!
طب اي
إزاي

ماريوت قعدة الصفوة بقا..

ماريوت بقا دا بتاع كريمة مصر من رجال أعمال
وزراء.
ساسة
حكام سابقين
أمراء عرب
نجوم مجتمع وفن
الماريوت ياجماعة فيه اي
دا فيه ناس عايشة فيه وحاجزة حجرات بالسنين
وبيعتبروا ان الإقامة فيه أرخص من الإقامة في بيوتهم توفير خدم وأكل وتنظيف وكهرباء. ولأنه مكان ساحر علي النيل والتاريخ وطبعاً اللي بيقيم فيه الصفوة والأسماء طويلة

منهم من انتقل لرحمة الله مثل الحج تيسير الهواري ملك الحديد
وسمير صبري ومنهم اللي ربنا يديهم الصحة وصعب أذكر أسماء
صعب الواحدة تفتح في الكلام وتبحبح
بس يعني تيجي الأستاذة لميس تقول ماتعرفش تدخل حمام ؟!!
دا كلام

أولد كتاركت اللي بنعدي جنبه في أسوان بتاع الملوك صعب تشربي فيه فنجان قهوة؟!!’

وبعدين مش الفندق دا آخر تجديدة سحبت ملايين أيام علي عبد العزيز لما كان ماسك فنادق مصر اعتقد في 2008 قعد 3 سنين يجدد فيه؟
إلا صحيح فين علي؟

وسعت أوي ،، جاملي هشام بس مش كدا
صحيح أنتي وزوجك أصحاب له من زمن طويل
من أيام أوربيت والعالم اليوم وعلاقتكم جامدة أوي أوي أوي
بس ما تطلعيش تبرري بالمنهج دا
فيه طرق أخري كثيرة
قال ماتعرفش تشرب فنجان قهوة قال!!!
آه علي رأي توفيق الدقن
يمين علي عظيم ولا بلاش

شهيرة النجار