لبس الفنانات والفساتين مصيرها اي؟ موضوع كل بنت في مصر بتسأله لنفسها كل يوم نحكي

لما تتابع فنانة مثلا تظهر في الأسبوع 7 مرات بفساتين مختلفة
او تقدم فيلم ولا ترتدي ولا تكرر ما لبسته مرة آخري
أنا بتكلم عن جيل آخر 7 سنوات بسّ
قبل كدا
يعني جيل شادية لمريم فخر الدين
لفاتن حمامة لهند رستم
نجد أنهن كن يكررن ما ارتدوه قبلا في أكثر من فيلم
مثلاً شادية ارتدت بلوزة مخططة في فيلم أنت حبيبي في أغنية زينة وارتدتها في فيلمين بعد ذلك مثل المرأة المجهولة وفيلم آخر مع كمال الشناوي
هند رستم لبست اكسسوار وفستان ابن حميدو في فيلم صراع في النيل
واكسسوار ابن حميدو في هنومة فيلم باب الحديد
عادي يعني
لكن هنا بقا وضع المطربات والمذيعات اللائي نجد أرقام فلكية للفساتين التي يتم لبسها ايه؟

بص يا سيدي

المسألة مختلفة جداً
فيه مغنيات يشترين فساتين الحفلات
وبأرقام كبيرة
وفيه بعضهن يتفقن مع صاحبة اتيليه ان تعمل دعاية لها وتعيد الفستان مرة آخري
وفيه مصممين ومصممات أزياء يتهافتوا علي الفنانات حتي يرتدين من عندهم كنوع من الدعاية والضرب في بعضهم البعض
وبعدها يتركوا أو يأخذوا الفستان مرة آخري

وفيه مصممات
جدد يحتجن الشهرة ومن أجل جذب زباين كبار يقمن بالباس مذيعات واحيانًا يهدوا اللبس لهم حتي تكون دعاية لهم وفي نفس الوقت المذيعة دي أو غيرها هتجلب زبائن للمصممة الجديدة ودا منتشر بالهبل
وكدا الاثنين الأولي ضمنت تلبس ببلاش وقت ماتحب
او تعيد ما ترتديه
والثانية ضمنت الدعاية ونوعية زباين تصبو لهن
تمام؟
لسه
فيه بعض المذيعات كل يوم بفستان يعني 365 فستان بالسنة إزاي ؟
من المصممين والمصممات ويرجع ثانيه
حتي لو نزلن دول لمهرجان مربطين مع أصحاب المحلات يأخذوا اي شيء وسيتم إعادته مرة آخري
في المغرب
دبي
السعودية بقا دول بيهدوا اللبس اللي أتلبس كرم بقا
يعني لما تلاقي مهرجان وفيه لبس كتير وحاجات كدا أعرف انه من ذات البلد وراجع لصاحب المكان ثانيه وواخد دعاية اومال
شهيرات الفن المصري حد يطول
بس فيه مصممات أعرفهم كويس كانوا بيلبسوا فنانات راحلات شهيرات ببلاش وبدون رجوع اللبس لان عارفين كويس ان هيجي زبائن ثقال من بتوع الخليج وكمان الفنانات كن يأخذن عمولة كمان
طبعاً مش بتشهر المصممة وهي اسمها براند وحده فتلبس من عندها
وكمان تجيب زباين وعلاقات وكله
دول كانوا معلمات وأساتذة
بس ربوا تلميذات نجيبات الحقيقة فيه في السوق معلمين الخياطين اقصد المصممين قاتلين نفسهم عليهم أومال

طب لو مناسبة جامدة أوي ومصممين كبار زي بتوع لبنان؟ إيلي صعب
زهير مراد!!
دول مش بهزروا تأخذ تدفع
عدوا مرحلة الانتشار
كان زمان بيلبسوا صباح ببلاش ويبوسوا أيديها ترضي تلبس من عندهم
لكن لو مصمم لبناني جديد بيلبس بلاش دعاية
طب فيه لبس يتلبس تصوير ويرجع ثاني؟
فيه
وكتير أوي
طب فيه لبس ماركات من باريس وأمريكا دا وضعه ايه؟
علي حسب لو حد جايب هنا بياخدوا يلبسوا دعاية ويرجع
وإذا كان من خارج مصر يدفعوا

طب مصير اللبس المشتري ايه؟
اما يباع مرة آخري وبنفس السعر وربما أعلى
أو يتعمل عليه مزاد كتيمي وفيه سيدات بالهبل من بتوع جنون الشهرة بيدفعوا
لكن اللبس البسيط دا بكل أسف بيشتروه
وايدهم بتوصل لجيوبهم
وأحياناً بيجي هدايا
بس يا سيدي ادي كل القصة بسيطة جداً
بتوع اليومين دول من بعض المذيعات
و بعض المطربات
بعض الفنانات بيلبسوا ويرجعوا اللبس وأصبح حتي ماشاء الله لهن سماسرة
وقال ايه استايلست دي بقا تلبسك اي علي اي
ولما تكون واعية شويتين بتتفق مع أصحاب محلات اللبس
الاكسسوار
الألماظ
النظارات
كافة شيء يتلبس ويرجع تاني ويتقال من عندهم
وهنروح بعيد ليه
الجونة جي الله حي ركزوا
هتلاقوا اسم المصمم قبل إسم الفنانة احنا بنهزر
كان زمان بيدفعوا تمن الفستان لكن لما أصبحت المهرجانات مناسبة للاستعراض أصبحت المسألة صعبة
الموضوع طويل وكبير ومعقد ومعروف وبالأسماء لكن المتاح من الكلام دا
فيه طبعاً نجمات عمرهم ما لبسوا ورجعوا بالعكس بيشتروا مجاملة مثل نبيلة عبيد ودا علي يدي
وفيه فنانات يرتدين ويخزن اللبس مثل نجمة استعراض كبيرة سنا ومقاما ونجمه ثمانيات

والله تعالي أعلي وأعلم

شهيرة النجار