عش الهوا المهجور ونجاة علي وقصة مذيعة لامعه ترويها لأول مرة لما الإعلام كان بيدخله ولاد الناس الشبعانة علم ومال وثقافة دا لما…

نشرت المذيعة والإعلامية الكبيرة غادة الطويل عبر حسابها الشخصي فيس بوك
قصة من أمتع ما يكون عن ذكريات طفولتها كل أبطالها نجوم زمن جميل فن وعلم واعلام
نجوم كانوا ملء السمع والبصر
نشرت غادة

أنا فاكرة اليوم ده كويس قوي…كنت خلصت ٦ ابتدائي و في اجازة الصيف…و لقيت بابا و ماما بيتكلموا عن ان بالليل جاي لنا ضيوف مهمين جدا..
و ماما بتروق البيت و بيحضروا حيقدموا ايه للضيوف
الحقيقه…احنا في بيتنا كنا دايما متعودين على الضيوف خصوصا لما پاپي بيكون موجود.

و سمعتهم بيتكلموا عن ان الضيوف اللي جايين فيهم المطربه الفنانه “نجاة علي”…اللي امي اصلا سموها نجاة على اسمها…تحمست جدا !!! رغم اني طول عمري كنت خجوله جدا و مبعرفش أقول كلمتين على بعض (عكس دلوقتي خاااالص 😂😂😂) بس طبعاً كنت متشوقه جداً أقابل المطربه اللي مثلت فيلم “دموع الحب” مع الموسيقار محمد عبد الوهاب.
وصلوا الضيوف…و كانت معاهم حبيبة قلبي و امي الروحيه و صديقة امي و أبويا الإعلامية الكبيرة طنط كاميليا الشنواني❤️❤️❤️و الإعلامي رائد من رواد الاذاعه المصرية زوجها انكل طاهر أبو زيد
طبعاً بما اني طفله …كنت باسلم على الضيوف و ماقعدش كتير معاهم…ممكن اساعد ماما في تقديم المشروبات و الضيافه
..بس مينفعش اقعد مع الكبار
المهم شوفت طنط نجاة و الضيوف التانيين اللي مكنتش اعرفهم و قعدت شوية
..و قومت
بس كان نفسي اقعد معاهم طبعاً

و سهروا شوية و مشيوا …بس أنا سمعت
ماما بتعزمهم على الغدا بعد كام يوم…

و لأن امي أصلا من بحري فكانت شاطرة جداً في طهي الأسماك….كانت بتبقه عزومة سمك….مفيش اشيك ولا اشهى من كده.

يوم العزومة….جت طنط نجاة و زوجها و ناس مش فاكرة هم مين…و معاها حفيدتها الصغنونه الجميله الشقيه ام عيون مليانه شقاوة و حياه و لمعه …(فاكره نظرة عينيها لغاية دلوقتي)…مروة

مروة كانت اصغر مني كذا سنه….بس من ساعة ما وصلت قعدنا نلعب مع بعض…و قضينا وقت جميل جدا…و نشات بيننا صداقه جميله استمرت سنين و سنين

نسيت اقوللكم
ان بعد الغدا…طنط نجاة قالت عايزاكم تسمعوا اغنيتي “عش الهوا المهجور” بصوت مروة

و بدات الطفلة الجميلة مروة….تغني

فاكراك و مش حانساك
مهما الزمن قساك
ولا نسيت حبي
و ان روحت مرة تزور
عش الهوا المهجور
سلم على قلبي

صوتها كان رائع
صحيح كان حاد شوية علشان كانت طفله صغيرة
..بس كان صوت نقي و صافي و رائع
و ودنها موسيقيه …و الكل توقع انها حتطلع مطربه جامده جدا لجدتها…

بس مروة النهارده
..هي مروة الطوبجي صحفيه جامده جدا في الأهرام…و اخر اخبار عندي انها كانت رئيس تحرير مجلة نص الدنيا

حكاية من زمان قوي…محفورة بتفاصيلها في وجداني و ذاكرتي….حبيت احكيها…
واتمنى مروة تقرأها و يكون عندها صور لنا مع بعض من زمان❤️❤️❤️❤️
و نقول الله يرحم طنط نجاة و يرحم امي و يرحم الايام الجميله🙏🙏🙏اللهم آمين

ملحوظة مين نجاة علي؟

وُلدت في فارسكور بـمحافظة دمياط سنة 1913، وتوفيت في 26 ديسمبر 1993.
ابتدأت حياتها الفنّية صغيرة السّن عندما توفّي أبوها سنة 1930، فكّرت في احتراف الغناء.
اكتشفها شاعر الأغاني حسين حلمي المانسترلي أحضرها من الرّيف، وتعهّدتها شركة أوديون، واشتهرت كمطربة.
اشتركت في أول حفلة علي مسرح الأزبكية في سنة 1929.
اشتركت في حفل افتتاح الإذاعة المصرية سنة 1934 مع أم كلثوم، ومحمد عبد الوهاب.
أغنية (سر السعادة) هي أول أغنية تسجلها للإذاعة.
تتلمذت على يد داود حسني.
اكتشفت رياض السنباطي، وكان وقتها عازف عود في فرقتها.
سجلت حوالي 90 اسطوانة، وعدد كثير من الشرائط في الإذاعة.
عاشت نجاة في الإسكندرية بعد اعتزالها الغناء في الإذاعة في أوائل الخمسينيات.
تزوجت من ضابط كبير بالجيش يدعى الطوبجى، ولها منه ولد اسمه ممدوح.

ومن أعمالها

وفيه ناس طيبين (مسلسل) 1981
لحظة اختيار (مسلسل) 1978
المفسدون في الأرض (مسلسل) 1973
ياسين وبهية (مسرحية) 1965
دموع الحب مع محمد عبد الوهاب 1935.
حب من السماء 1943.
شيء من لا شيء 1938.
الحظ السعيد 1945.
الكل يغني 1947.
الشاطر حسن 1948.
معجزة الحب 1931.

ومن أشهر أغانيها

فاكراك ومش هانساك.
عيد الشباب.
يالايمين في الهوي.
أل إيه دلوقتي ما بيحبش.
صلح الحبيب مع رياض السنباطي
قلوب الحبايب.
من بعيد لبعيد.
بتشاغلني.
غنيت للناس.
قصيدة الأطلال لحن محمد فوزى

شهيرة النجار