في ذكري ثورةً يوليو من مذكرات الابن: عندما قال أبويا ل جمال عبد الناصر ؛ ايه اللي جابك هنا يا جمال؟ من جديد انقل لكم منشورا كتبه الدكتور أسامة شوقي ولكن ليس هذه المرة عن الطب وطبيبة سوهاج ولكن عن جمال عبد الناصر ووالده كتب شوقي

حبايبي يوكا و اووفي..
لقيت كنز نادر حيفرح قلبكم و يخليكم فخورين ب جدو شوقي الراجل العظيم اللي مشفتش زيه في حياتي..
مشفتش زيه في قوته و رجولته و اعتزازه بنفسه و كمان خفه دمه اللي خلت كل الناس تحبه و تحترمه..
..
كان ترتيبه التاني علي دفعه الطيران ..و لقيت كتاب نادر عن احتفال الضباط الأحرار ب ثوره يوليو ٥٢..و كان الاحتفال يضم كل خريجي دفعه عبد الناصر..

جدو شوقي كان يعرف ناصر من قبل دخول الحربيه ، هو و عبد الناصر كانوا في المدرسة سوا في الإسكندرية و جدو شوقي كان بيشكر فيه و يقول انه كان طالب مؤدب و جد و جدع..

و بعد شهاده البكالوريا ( اللي هي زي الثانوية العامة دلوقتي) ، سافروا الي القاهرة و جدو شوقي دخل كليه العلوم و عبد الناصر علي ما اعتقد قدم في كليه الحقوق..

و كان معاهم ممدوح سالم اللي أصبح رئيس وزراء مصر و دخل وقتها كلية الشرطة..
لكن بعدين، جدو شوقي ترك كليه العلوم و تقدم إلي سلاح الطيران الملكي و كان لسه حاجه جديده خالص و خطر جدا عشان حوادث الطيارات البدائيه..و عبد الناصر تقدم للكلية الحربية..

جمال عبد الناصر كان بيحب جدو شوقي جداً و معجب بنزاهته و رجولته و كان نفسه يضمه للضباط الأحرار و لكن جدو شوقي مكنش موافق علي الفكرة ، و كان شايف ان الجيش لا يجب ان يتدخل في السياسة و ان اصلاح البلد يكون بالاحزاب المدنية..

في فصل كامل في الكتاب دا عن ذكريات جدو شوقي برجال الثورة رغم انه لم يكن عضو في تنظيم الضباط الأحرار و لكن كتير منهم كانوا زملاءه و منهم أصحابه ..

و في حكايه طريفه حكاها عبد الناصر عن جدو شوقي 😂 ..

قبل ثوره يوليو و أثناء الإعداد لها ..ذات يوم اتي جمال عبد الناصر إلي المطار اللي جدو شوقي كان بيشتغل فيه ، لمقابله زملاءه من تنظيم الضباط الأحرار من سلاح الطيران 👨‍✈️🧑‍✈️ و جدو شوقي مكنش يعرف حاحه وقتها عن الموضوع دا ، و لا كان يعرف ان عبد الناصر بيرتب للثورة ..

ف لما شافه جدو شوقي في المطار في وقت متأخر بالليل استغرب و قال ؛
” ايه اللي جابك هنا يا جمال ؟؟”🤭🤭

و لما عبد الناصر حكي الحكايه دي في الاحتفال، كل الناس ضحكوا و بصوا ل جدو شوقي و قالوا له؛

• إزاي استجريت تقول كده لجمال عبد الناصر😮😮

جدو شوقي بص لهم باستغراب و رد ضاحكاً؛

• و هو أنا كنت أدري انه حيبقي رئيس جمهورية 😂

فانطلق الجميع في ضحك متواصل و قام عبد الناصر يشد علي كتف جدو شوقي و قال له،

• طول عمرك مقاوح يا شوقي😂😂😂😂

حبيبي يوكا و حبيبي اووفي..
هو دا جدو شوقي الراجل العظيم اللي افتخر اني ابنه و انتم احفاده..
بابا أسامه

شهيرة النجار