بكلم صديقة بالساحل كل ما أكلمها تقول لي معلهش أصل رايحة عزومة
عزومة عزومة
قلت أعتقد إنتي بتروحي في اليوم 3 عزومات؟
قالت لي بتقولي فيها
والله مش بلاحق
رد عزومات
مجاملات
الصيف هو أصلا عشان كدا
بس آخر سنتين زادت جدا
دا فيه بيوت بتعمل في الأسبوع بالأربع عزومات ودعوات ل 300 و400 فرد
بتلككوا علي مناسبة
أقل مناسبة لو 100 فرد تكلف 200 ألف جنيه بالميت بين أكل وكاترينج
ولو فيه بوفيه شرب روحيات عدي
وطبعا دا الغالب
وعندكم من إسكندرية سيدة ماشاء الله مش ملاحقة هي وجوزها علي الكاترينج والبوفيهات، للعزومات موسم ماشاء الله
آخرها عزومة سيدات عملتها زوجة رجل أعمال ورئيس نادي عندكم في إسكندرية لحوالي150 سيدة معروفات وزوجات رجال أعمال معروفين وبناتهم وسيدات أعمال ثقال في السوق من ذوي المليارات.
العزومة معدية ال 200 ألف في هسيندا
وعزومات الشباب لبعضهم في المطاعم
وفي الفيلات
وفي اليخوت
وعزومات الكبار
وعزومات العمل والتربيطات
وعزومات رد العزومات
وعزومات الفراغ والتسلية
وعزومات احنا لسه موجودين
وعزومات احنا الكبار
وبين كل تسمية من دول تشوفي أصناف عجب من الأطعمة والمشروبات
واللبس
وطبعا ديفيله لبس لم ينزل بر مصر بعد
الا بالساحل
السيدات محضرين الفساتين من رحلات من تركيا من الشتاء الماضي
. واللي يتلبس مرة مايتلبش ثاني خلاص
لإن نفس المدعويين هم هم إزاي تلبس وتتشاف بالموديل مرتين بالساحل
دي سمعة ياناس واسمهم في السوق بين السيدات
والرجالة هتكلم قبل الستات دا ملبس مراته الفستان مرتين يع بخيل آوي
وبين العزومات تلاقي لازم الدخول بحاجة مناسبة للمكان وحسب مكانة اللي عازم واللي معزوم
يعني صيف غرامات في غرامات مش بتلاحقي تلبسي ولا تعزمي ولا تتعزمي وتشتري هدية عليها القيمة
صيف بقا وكل سنة وإنتي طيبة دول يا دوب شهرين في السنة
عندها حق فعلاً
وشهر رمضان والعزومات
والأعياد والعزومات
وطلعة الكريسماس والعزومات
مصر عايشة عزومات.
دول كلهم يا دوب 365 يوم في السنة
بيجوا من السنة للسنة
شهيرة النجار
and then