وبغض النظر عن أي حاجة وأي تفاصيل.. هو أكتر إعلان معبّر فعلا عن المنتج اللي بيقدمه.
الحمدلله.. أخيرا عشنا لليوم اللي مسمعناش كلام تنمية بشرية
ولا كلام عن لمة العيلة.. في إعلان مصري في رمضان.
ده إعلان قال حرفياً: يا فكيك من الكليشيهات دي.. عاوزين نعمل بهجة.. ونخلي الناس مينسوش مشروعنا.
عشان كده بذكاء اختاروا أجمل أغاني عبد الحليم من فيلم “أبي فوق الشجرة” وهي أغنية “قاضي البلاچ”.. أكتر عرض غنائي مبهج في تاريخ السينما.. وعايش في ذاكرتنا.
وفي الإعلان ده اتقدمت بشكل عصري وطريقة جديدة بصوت بنوتة شابة هي ملك الحسيني.. عشان تطبع في ذهننا للأبد.. وفعلاً نجحوا في ده.. واستدعوا معانا مشهد عبد الحليم الخالد وهو واقف على شط إسكندرية مع شباب وشابات بألوان مبهجة ورقص وفرح وبيغنوا “دقوا الشماسي.. من الضحك حتى التماسي”.. بس بريميكس وشقاوة جديدة.
الإعلان ده فعلا هو أجمل فاصل إعلاني.. وأجمل ريميكس لأغنية قديمة.. لو اشتغل لوحده هيعمل بهجة من غير حتى ما تعرف فيه إيه..
بعض الانتقادات مفهومة طبعاً.. لأن فيه ناس عندها مشكلة مع أي حاجة جميلة مبهجة.. حتى عندهم مشاكل مع فانوس رمضان والزينة والكنافة.. لأن كل دي بدعة وكل بدعة ضلالة.. ولا ضلالة في الحقيقة أكتر من إنك تشوف مياه وهوا وفرحة ومزيكا وتقول: يع.. وحش!.
شهيرة النجار